Gubernur Ahmad Heryawan, dipoto sareng Polda Jabar, Irjen Pol Anton Charlian, Pangdam III Siliwangi Mayjen TNI Muhammad Herindra, Ketua DPRD jabar, Ineu P. Sundari, Ketua Kejati Jabar, Setia Untung, Wakil Walikota Bandung Oded M Danial, sarta perwira TNI Polri, sabada Upacara HUT Bhayangkara ka-71 taun
majalahsora.com, Bandung – Kepolisain Republik Indonésia, ping 1 Juli 2017, nincak umur nu ka-71 taun. Patalina jeung hal kasabit poé Senén, ping 10 Juli 2017, Jokowi, salaku Presiden RI jadi inspektur Upacara HUT Bhayangkara ka-71 tingkat nasional di Lapangan Monas, Jakarta.
Salian di Ibu Kota kagiatan kasabit gé direuah-reauh disakabéh wilayah nu aya di Indonésia. Kaasup di Pamaréntahan Propinsi Jawa Barat. Dijejeran “Dengan Semangat Profesionalitas dan Modernisasi Polri Berkomitmen untuk Meraih Kepercayaan Masayarakat Demi Tetap Tegaknya Negara Kesatuan Republik Indonésia yang Sejahtera Mandiri dan Berkeadilan”.
Upacarana digelar di Lapang Gasibu Bandung, nu diinpsekturan ku Ahmad Heryawan salaku Gubernur Jawa Barat. Acarana diluuhan ku Kapolda Jabar, Irjen Pol Anton Charlian, Pangdam III Siliwangi, Mayjen TNI Muhammad Herindra, Ketua DPRD Jabar, Ineu Purwadewi Sundari, Kajati Jabar, Setia Untung, réngréngan Pemda Jabar, Polda Jabar, réngréngan Kodam III Siliwangi, jrrd.
Mangsa jadi Inspektur Upacara Ahér macakeun pangbagéa ti Présiden Jokowi, nya éta ngaapresiasi kinerja kapulisian dina miara kaamanan reujeung katertiban masyarakat. Di sagigireun éta muji kana gawé nyata kapulisian, salah sahijina lancar jeung kondusifna arus mudik lebaran taun 2017 ayeuna, ogé angka kacilakaan nu nyirorot.
Salian ti éta kapulisian gé hasil ngajaga kaamanan salila Pilkada serentak nu lumangsung di 101 daérah. Nilik kana survey, kapercayaan masayarakat ka Pulisi téh mingkin nikel.
Sabada ngalaksanakeun upacara HUT Bhayangkara, aya sababaraha runtuyan acara nu dilaksanakeun kayaning pintonan seni ti Pulisi jeung TNI, laju diteruskeun ku parade tur defile ti kesatuan Kapulisian Polda Jabar, kayaning kesatuan Serse, Narkoba, Jihandak, Lantas,Intel, Brimob, kendaraan operasional pulisi, LSM, Paguyuban Jeep Bandung, Paguyuban Sapédah Baheula, jsté.
Ahmad Héryawan, miharep, dina umur nu-ka71 taun, Kapulisian RI téh kudu leuwih profesional, moderén solid sarta kudu leuwih siap méré pelayanan ka masarakat. “Insya Alloh kapulisian RI jadi kareueus masarakat. Sim kuring ngajénan pisan kana kinerja kapulisian dina mémérés tur miara kaamanan di Jabar, kalebet nangkes tur megatkeun terorisme, pokna.”
Dina kasempetan lianna, Kapolda Jabar, Irjen Pol. Anton Charlian nétélakeun, ku kondisi jeung kaayaan di Jabar nu luar biasa, mangka sakabéh jajaran Kapulisian nu aya di lingkungan Polda Jabar kudu luar biasa ogé. Digawé ku cara luar biasa sangkan kaayaan di Jabar aman jeung tingtrim.
Ineu Purwadewi Sundari , salaku Ketua DPRD Jabar, muji kana kinerja Kapulisian, utamana di Jawa Barat, anjeunna ngécéskeun yén aman tertib jeung stabilitasna kaayaan di Jabar téh teu lésot tina kinerja Pulisi nu hadé. Dipiharep saterusna bisa miara kaamanan di Jabar, wilujeng Hut Bhayangkara nu ka-71. [SR]***
