Jakarta – Pa Anies Baswedan, Menteri Pendidikan & Kebudayaan Indonésia, ngajéntrékeun dina taun ajaran 2016-2017 ayeuna teu meunang aya kagiatan ospék!
Méméh aya larangan di luhur geus ilahar unggal taun jeung unggal sakola, kayaning di SMP/MTs, SMA/SMK/MA sa-kuliah Indonésia sok ngalaksanakeun perpeloncoan ku lanceuk kelasna.
Tujuanana teu meunang ngospék téh, keur ngurangan korban kekerasan ti lanceuk kelasna, boh sacara pisik boh sacara psikologis. Komo mangsa méré tugas nu teu pikahartieun mah.
Pokona mah dina taun ajaran ayeuna mah siswa anyar téh, diaping ku para guruna. Engké mangsa penutupan aya pintonan ekskul.
“Ayeuna mah teu aya perpeloncoan/ospék ku lanceuk kelasna. Bisi janten matak, senioritas di sakola, senior ka junior. Komo tugas harian nu biasana anéh-anéh, sapertos ngitung béas, ngobrol sareng tatangkalan, topi tina bal pelastik, jrrd. Nu kitu téh ngarendahkeun akal pikiran. Ayeuna mah dongkap ka sakola anyar téh, kedah pikaresepeun, ngajelaskeun kaunggulan sakola, tur ekskul (kagiatan olahraga, seni, sain, jsté) nu matak narik ati, jeung réa-réa deui,” saur Pa Anies Baswedan. [MS]***
