SMPN 23 Kota Bandung (beureum hideung) vs PGRI Kota Bandung (beureum koneng)
majalahsora.com – Babak delapan besar Sora Cup II lumangsung poé Juma’ah ping 19 Méi 2017. Magelarkeun opat pertandingan. Nya éta SMAN 17 Kota Bandung vs SMAN 10 Kota Bandung, SMK Merdéka Kota Bandung vs SMAN 25 Kota Bandung, SMPN 23 Kota Bandung vs PGRI sarta MTs Attaufik Kota Bandung vs SMK Nusra Kota Bandung.
SMK Nusra (koneng hejo) vs MTs Attaufik (koneng hideung)
Dina saban pertandingan, midangkeun permaénan nu narik ati. Sanajan aya sababaraha pertandingan nu skorna jomplang, kayaning MTs Attaufik vs SMK Nusra, nu skorna 11-1 keur kaunggulan MTs Attaufik, di sagigireun éta aya SMK Merdéka vs SMAN 25 Kota Bandung, SMK Merdeka meunang 5-0.
Bu Erni Kepala SMPN 23 Kota Bandung (acuk gandari) mangsa ngbobotohan timna nu hasil lolos ka semifinal
Mangsa pertandingan SMAN 17 vs SMAN 10 Kota Bandung, pertandinganana bajalan ketat, SMAN 10 Kota Bandung hasil lolos ka semifinal satutas ngéléhkeun SMAN 17 Kota Bandung, skorna 3-1. Kitu deui basa pertandingan SMPN 23 Kota Bandung vs PGRI, pertandinganana bajalan ketat, silih bales ngagulkeun. SMPN 23 Kota Bandung dua kali tinggaleun skorna téh. Mangsa babak kahiji tinggaleun hiji enol, laju bisa ngabales, kitu deui mangsa babak kadua kungsi tinggaleun, dimenit-menit panungtungan bisa nyaruakeun skor deui 2-2. Basa gulgulan, tilu pamaén SMPN 23 Kota Bandung hasil ngasupkeun tilu gul, sedengkeun PGRI ukur saurang nu suksés nyitak gulna téh. Ku kituna SMPN 23 kota Bandung nu langsung dilalajoan ku Kepala Sekolahna, nya éta Bu Erni, maju ka semifinal, skor ahirna 6-4.
Guru jeung siswa nu ngabobotohan SMK Nusra Kota Bandung dina kagiatan Sora Cup II
Alatan aya sababaraha hal nu mangaruhan jadwal nu geus ditangtukeun panitia, babak semifinal jeung final Sora Cup II nu baris dilaksanakeun poé Saptu 19 Mei 2017 téh, jadwalna di undur jadi poé Salasa:
Jadwal pertandingan semifinal Sora Cup II, Salasa ping 23 Mei 2017, tempatna di Lapang Progresif Soekarno Hatta:
- SMAN 10 kota Bandung vs SMPN 23 Kota Bandung, pukul: 17.30 – 18.10
- SMK Merdeka Kota Bandung vs MTs Attaufik Kota Bandung, pukul: 18.10 – 18.50.
- Marebutkeun juara katilu, pukul: 19.40 – 20.20.
- Final, pukul: 20.20 – 21.00. [MS]***
