H. Muhammad Lukman, M.si., Kepala SMKN 12 Kota Bandung nu ngarangkep janten Ketua MKKS SMK sa-Kota Bandung
majalahsora.com – Ping 3-6 April 2017, SMK di sakuliah Indonésia rempeg ngalaksanakeun ujian nasional. Pelaksanaanana téh aya nu berbasis keretas jeung komputer. Poé kahiji pelajaran Basa Indonésia, poé kadua matematika, poé katilu Basa Inggris, laju poé pamungkas téori kejuruan.
Patalina jeung pelaksanaan ujian nasional taun 2017, di Kota Bandung diiluan ku 107 SMK negri swasta. 100 % baris ngalaksanakeun ujian nasional berbasis komputer, boh sakola negri boh swasta. Jumlahna 16 SMK negri sésana SMK swasta.
Ngan dina prakprakanana mah rupa-rupa, aya nu mandiri jeung nu ngilu di sakola batur, tempat jeung fasilitasna téh. Lamun dipersentasikeun mah nu mandiri aya 83.59 % sedengkeun 16.41 % ngilu di sakola batur.
SMKN 12 Kota Bandung, nu dipupuhuan ku H. Muhammmad Lukman, M.Si., kaasup sakola nu ngalaksanakeun UNBK sacara mandiri. Jumlah siswa nu ngiluan ujian nasionalna aya 380 urang, ti genep kompetensi keahlian, nya éta Konstruksi Pesawat Udara, Konstruksi Rangka Pesawat Udara, Permesinan Pesawat Udara, Elektronika Pesawat Udara, Kelistrikan Pesawat Udara sarta Airframe and PowerPlant.
Kagiatan UNBK di sakola nu aya di Jalan Pajajaran nomer 92 téh, dibagi tilu pluh, nu mimiti ti pukul 07.30-09.30, diteruskeun pukul 10.30-12.30, pluh terahir lumangsung pukul 14.00-16.00. Rohang ujianana aya opat, nya éta di laboratorium komputer. Masing-masing ngawadahan 36 unit komputer. Sedengkeun serverna aya dalapan kaasup jeung cadangan.
Hasil UNBK téh memang teu mangaruhan kana kalulusan. Da nu jadi bahan lulus henteuna mah, nya éta nempo tina hasil ujian sekolah berbasis nasional (USBN). Mata pelajaran nu di ujikeunana téh nya éta pelajaran PPKN, agama, sarta keterampilan komputer.
“SMKN 12 Kota Bandung insyaAlloh siap mayunan UNBK taun 2017. Ieu téh mangrupi UNBK nu kadua kali. Taun kamari alhamdulillah lancar. Sanaos kungsi aya masalah dina sinkronisasi komputer ka pusat. Taun kamari gé dugi ka subuh. Komo ayeuna jumlah SMK nu ngalaksanakeun UNBK-na langkung seueur. Salian ti éta gé perkawis listrik mudah-mudahan aman,” saur H. Lukman, Kepala SMKN 12 Kota Bandung nu ngarangkep janten Ketua MKKS di rohang damelna.
Taun 2016 kamari, SMKN 12 ngagunakeun tilu lab. Komputer, jumlah komputerna aya 108 unit, keur 214 urang siswa. Ku sabab taun ayeuna jumlah siswna nambahan, jadi kudu nambahan saranana. Nya éta meuli 40 laptop anyar jeung dua server. “Ngahaja ngagaleuh laptop téh ambéh teu minuhan lab komputer, langkung praktis, pami tos beres tiasa disimpen di lomari,” saur H. Lukman téh. [MS]***
