Drs. Slamet Heryadi, M.Pd., Kepala SMKN 15 Kota Bandung
majalahsora.com – Pelaksanaan UNBK tingkat SMK poé kahiji (Senén 3 April 2017) di SMKN 15 Kota Bandung, dilongok ku H. Deddy Mizwar, Wakil Gubernur Jawa Barat. Dina éta kasempetan anjeunna ngalongok ka tilu rohangan peserta UNBK. Sumpingna mangsa reureuh, maju ka sési kadua pelajaran basa Indonésia.
H. Deddy Mizwar Wagub Jabar nuju talatah sangkan siswa SMKN 15 tong tegang mangsa ngeusian soal UNBK
Ka para peserta UNBK anjeunna talatah sangkan tong tegang mangsa nyanghareupan tur ngeusian soalna. “Anggap wé saperti nuju maén game komputer, ambéh enjoy ngeusianana,” Saur H. Deddy Mizwar semu imut.
H. Deddy Mizwar muji kana kasiapan SMKN 15 Kota Bandung dina nyanghareupan UNBK taun 2017
Pikeun warga SMKN 15 Kota Bandung, sumpingna Wagub Jabar ka kampusna téh, mangrupa hal nu teu disangka-sangka. Da taya béja ti anggangna. Poé éta pisan ibér rék katatamuan ku Wagub Jabar-na téh.
DR. H. Dodin R Nuryadin, M.Si., Kepala Bidang SMK Dinas Pendidikan Jawa Barat
“Alhamdulillah, SMKN 15 Kota Bandung Kasumpingan H. Deddy Miwar, Wakil Gubernur Jawa Barat. reuwas kareureuhnakeun sareng atoh sakola mah, pangpangna kapilih dilongokan ku Pa Wagub,” saur Drs. Slamet Haryadi, M.Si., Kepala SMKN 15 Kota Bandung.
Poto Kenca ka katuhu, Drs. Slamet Heryadi, M.Pd., Kepala SMKN 15 Kota Bandung, Pa Dede Amar, Kepala BP 3 wilayah IV Disdik Prov. Jabar, Bapa M.A Welid ti Pemprov. Jabar, DR. H. Dodin R Nuryadin, M.Si., Kepala Bidang SMK Disdik Prov. Jabar
Peserta UNBK di SMKN 15 Kota Bandung aya 243 urang. Nu ngawengku kompetensi keahlian, Pekerjan Sosial jeung Akomodasi Perhotélan, kabeneran 100 persen hadir dina poé kahiji ujian téh. Jumlah komputerna aya 90 unit. Jumlah serverna aya tilu, cadangan hiji. Ari pengawasna mah pengawas silang, guru ti SMK Profita, SMK Dharma Bakti jeung SMK Gracia, kabéh ti Kota Bandung.
Dipoto sareng Pa Wagub Jabar
“Alhamdulillah siswa SMKN 15 Kota Bandung teu grogi mangsa mayunan komputer. Da tos biasa ngagunakeunana. Sateuacanna gé tos sababaraha kali ngiringan try out, simulasi sareng gladi beresih UNBK. Kitu ogé proktor sareng teknisina siap pisan,” saur Drs. Slamet Heryadi, M.Pd., téh.
Insya Alloh SMKN 15 sagancangna meunang bantuan pangwangunan gedong anyar ti pamarentah
Salian ti H. Deddy Mizwar, DR. H. Dodin R Nuryadin, M.Si., salaku Kepala Bidang SMK Dinas Pendidikan Propinsi Jawa Barat nu nyarengan pa Wagub gé reueus, basa ningal penyelenggaraan poé kahiji UNBK di SMKN 15 Kota Bandung. Anjeunna ningal langsung kaayaan sakola nu keur ngabangun sababaraha rohangan. Saprak nempoan kaayaan SMKN 15 Kota Bandung, Pa Dodin kagagas sangkan pamaréntah bisa nganggeuskeun tur mantuan waragad pangwangunan di SMKN 15, dina dangka waktu nu teu lila. [MS]***
