Poé Saptu isuk-isuk tanggal 5 Maret 2016, SMKN 4 Kota Bandung nu dipingpin ku Pa Edi Purwanto, ngalaksanakeun kagiatan Gebyar Penandatanganan Piagam Kerjasama jeung 16 pausahaan. Tempatna di kampus ieu sakola nu pernahna di Jalan Kliningan no. 6 Buah Batu.
Pausahaan nu nandatangan gawé bareng jeung SMKN 4 Kota Bandung téh, di antarana ITS Indonesia, AKAL Interaktif, Cisco, Skyline, PT. Haleyora, LEN, Oracle Academy, APJATEL, STI, DNA Initiative, Semesta Teknologi Indonesia, jrrd.
Kagiatanana diluuhan ku Pa Elih Sudiapermana, Kepala Dinas Pendidikan Kota Bandung, Pa Agung Suryamal Sutrisno, Ketua KADIN Jawa Barat, Bu Rita Hardyani, Kabid SMA/SMK Dinas Pendidikan Kota Bandung, Pa Muhammad Lukman, Kepala SMKN 12 Kota Bandung, Pa Yaya, Pengawas SMKN 4 Kota Bandung, para palaku usaha, jrrd.
Eta kagiatan téh salah sahiji tarékah SMKN 4 Kota Bandung, dina raraga ngaronjatkeun mutu sakola, kompetensi guru, sarana, siswa, katut lulusanana. Jaga, lulusan SMKN 4 Kota Bandung geus siap dina nyanghareupan kaayaan di lapangan nu saenyana.
Satutas nandatangan gawé bareng, pihak SMKN 4 Kota Bandung fokus numerapkeun program-program ti 16 pausahaan, nu luyu jeung tilu program keahlian sarta genep paket keahlian ieu sakola, nu éngkéna jadi model pembelajaran.
“Harepan ku kagiatan ieu, gawé bareng vokasi sareng industri mingkin raket. Para siswa gé jadi apal kumaha proses di dunya industri téh. Lamun élmu sarta pangalaman nu didugikeun ku ahlina langsung mah, mudah-mudahan tiasa ngahudang haté jeung sumanget para siswa, sangkan jadi pangusaha,” saur Pa Elih Sudiapermana, Kepala Dinas Pendidikan Kota Bandung.
Aya sababaraha program nu baris dilaksanakeunana. Di antarana program rekrutmen pagawé, sawala (diskusi), pelatihan, jrrd. Eta program-program nu baris dilaksanakeun téh kacida pentingna pikeun siswa SMKN 4 Kota Bandung. Saperti program pelatihan pemasangan instalasi listrik ti PT. Haleyora. Ditepikeunana ku ahlina langsung. Lila pelatihnana mah fleksibel.
“Ieu kagiatan téh salah sawios tatahar SMKN 4 Kota Bandung, sangkan téréh maju. Kirang langkung dua taun, lami kerjasamana téh. Engkéna tiasa dilajengkeun deui, malih nambihan gawé bareng saréng pausahaan nu sanésna. Salian ti éta, kanggo ningkatkeun kualitas lulusan SMKN 4. Lamun kualitas siswana mingkin saé mah, mudah-mudahan tiasa minuhan pangabutuh tenaga kerja nu diperyogikeun ku masarakat, malih lulusan ti SMKN 4 tiasa janten pangusaha sukses,” saur Pa Edi Purwanto, Kepala SMKN 4 Kota Bandung. [MS]***
