H. Iwa Karniwa, Sekda Jabar & Hj Herawati Pimbinan BJB cabang Utama Bandung
majalahsora.com, Bandung – Poé Rebo, ping 21 Juni 2017, Bank BJB cabang Utama Bandung, ngayakeun kagiatan acara Gathering & Silaturahmi, antara keluarga besar Bank BJB cabang Utama Bandung reujeung keluarga besar BPKAD (Badan Pengelola Kas Asli Daerah) Propinsi Jawa Barat.
Lumangsung di Ballroom Hotel Aryaduta, nu pernahna di Jalan Sumatera. Acarana diluuhan ku H. Iwa Karniwa Sekda Prop. Jabar, Hj. Herawati salaku pimpinan BJB cabang Utama Bandung, jajaran sarta karyawan BJB cabang Utama Bandung tur BPKAD, sakalian buka bersama. Kagiatan kasabit téh maneuh diayakeun saban taun.
Pa Iwa, salaku Sekda Jabar, nétélakeun BJB salaku organisasi profit, kudu bisa ngaronjatkeun lolongkrang kredit-kredit nu prudent/wijaksana. Salian ti éta terus ngamekarkeun networking ka sagala lini. Ku kituna BJB bakal terus ngajomantara jeung value pausahaan beuki nikel, nu diukur ku kahontalna target laba beresih reujeung handapna RPL.
Salah sahiji pangdeudeul Pa Iwa ka BJB téh, nya éta hadir langsung ngaluuhan kagiatan silaturahmi di Hotel Aryaduta. “Sangkan langkung maju, mangka kedah ngawasa kamajuan teknologi, basa deungeun, networking nu kuat sarta nanjeurkeun kataqwaan,” pokna.
Dina kasempetan lianna Hj. Herawati salaku pimpinan BJB cabang Utama Bandung, miharep ku kagiatan gathering tur silaturahmi kasabit bisa mageuhan tali silaturahmi. Alatan BJB cabang Utama Bandung téh nu nyepeng kas daérah Propinsi Jawa Barat, tur sapopoéna kakaitan ku pagawéan nu rutin.
“Alhamdulillah ku ieu kagiatan téh tiasa mageuhan tali silaturahmi antara keluarga besar BJB cabang Utama Bandung sareng keluarga besar BPKAD Propinsi Jawa Barat. Apan sadidintenna padamelanana téh aya kakaitna langsung sareng BPKAD. Ku kituna tiasa langkung raket gawé barengna téh. Hubungan emosionalna gé langkung karaos. Apan upami tos sapertos keluarga mah, mangsa mayunan hiji masalah téh tiasa langkung gancang,” saur Hj. Herawati téh. [SR]***
