Paturay Tineung Wisudawan-wisudawati SMK Negeri 13 Kota Bandung
Sobat Sora, poé Saptu ping 4 Juni 2016, wewengkon SMK Negeri 13 Bandung kacida haneuteun. Panggung anu dipaés basajan tapi nyeni, dihapit barisan padus angklung kéncaeunana. Réngréngan tamu kahormatan ngajalajar dina jajaran korsi panghareupna. 267 peserta didik putra lulusan taun ieu (2016) dariuk rapih sawanda reujeug dangdanan jas singsarwa hideung. Dangdanan kasundaan modéren keur para peserta didik putrina. Nyakitu para bapa guru, teu éléh kéwes maraké saragem batik warna coklat, ibu-ibu guruna dikabaya warna bulao.
Dr. Mia Rusmiasari, M.Si, Sekretaris Dinas Pendidikan Kota Bandung, basa ngaluuhan kagiatan paturay tineung SMKN 13 Kota Bandung
H. Ramdan, S.Pd, M.Si, Kepala SMK Negeri 13 (Plt) Kota Bandung (kénca) & Drs. Yaya Zakaria Kepala SMKN 13, manten (kadua ti kénca)
Basa kagiliran Kepala SMK Negeri 13 (Plt), H. Ramdan, S.Pd, M.Si biantara dina pangbagéana nandeskeun yén Sakola anu dipimpinna unggal taunna tara kurang ti dalapan kelas lulusan. Boh peserta didik anu nyokot masa pelajaran tilu taun (2 kelas TKJ) boh anu opat taun (6 kelas analis kimia). Sasama SMK taya dikatomi anu jadi jurang pamisah, boh sasama negeri boh sasama swasta atawa boh negeri boh swasta. Dipairan ku manten kepala SMK Negeri 13 Bandung, Drs. Yaya Zakaria. Taun ieu peserta didik lulusanana ngahontal angka 267 urang sarta 80 peresénna geus ditampa digawé di sababaraha pausahaan, di Bandung, Cimahi, Leuwigajah, Sukabumi, Bogor jrrd. Pangharepan kepala sakola sangkan lulusan sakola anu dipingpinna ngutamakeun wirausaha. Dina harti ulah salilana nungguan digajih tapi sabisa-bisa kudu ngagajih, tina status mustahik kudu mampuh jadi muzaki, lantaran pada apal mun leungeun di luhur téh leuwih hadé batan namprak di handap. Ulah keueung jeung galider sabab lulusan SMK Negeri 13 Bandung geus puguh skill-na dibarengan katerampilan siap paké. Sakumaha di Nagara Jepang anu leubeut mibanda home indrusti.
KBM SMK Negeri 13 geus dirarancang loba prakték tinimbang teori tapi ogé teu ngaluli-luli binaan karakter jeung prilaku hadé dina kahirupan sapopoé. Para peserta didik SMK Negeri 13 geus kakoncara palinter, optimal dina skill tepi ka baréto di jaman Drs. Yaya kungsi ngahasilkeun produk pupuk tanaman anu dimérekkan “buster” tina bahan baku bungbuahan buruk bisa dimangfaatkeun jadi pupuk (gemuk).
Tim upacara adat SMKN 13 Kota Bandung nu diaping ku Bu Ida (salémpang bulao)
Sora nepungan ketua pelaksana kagiatan wisuda sakaligus staf UMM, Ibu Rohayati, S.Pd. Bu Guru manis ahli kimia analis ieu kalawan dipairan ku Bu Hj. Karwati, S.Pd salaku epala TU ngadadarkeun ka Sora. Cenah sagalana atas kréatifitas para siswa, pihak sakola mah ukur memfasilitasi kaasup ideu téma-na murni beunang pamikiran maranéhna. Naon témana téh? Gamasvastika, kekecapan anu ditaruk tina Basa Sansakerta hartina perjalanan menuju ke arah lebi baik.
Jumlah panitia 30 urang ti pihak guru, 32 urang ti pihak siswa-siswi, OSIS katut ka MPK. Lian ti kagiatan pelepasan peserta didik kelas XII diteruskeun ku kagiatan pénsi (péntas seni) para siswa, bazzar jeung promosi sakola.Tamu undanganana ngawengku Bu Sekdis (Sekretaris Dinas Pendidikan Kota Bandung), wawail ti dunya industri (TKJ, Kimia jeung B4) katut ka sekolah aliansi Bumi Siliwangi, jajaran pemerintah, kepala désa, para pinisepuh katut ka para orang tua siswa. Satiap saurang wisudawan-wisudawati, wajib digéndéng ku indung-bapana.
Dra. Eén Rohaéni, Wakil Manajemen Mutu SMKN 13 Kota Bandung
Hj. Karwati, Kepala TU SMKN 13 Kota Bandung
“Alhamdulillah, ti taun ka taun kagiatan pelepasan wisudawan matak nyugemakeun sarta mugia baé langkung khidmat ti taun sateuacanna,” saur Hj. Karwati reueus. “Lulusan SMK Negeri 13 moal lésot tina konsép BMW, bekerja, melanjutkan kuliah turta wirausaha,” pokna deui nandeskeun.
Ibu Rohayati, S.Pd. Ketua Pelaksana Wisudaan
Bu Popong Wariati, S.Pd.
Hj. Aam Siti Nur Rochman, ST
Sora ogé nepungan Sekdis Disnas Pendidikan Kota Bandung, Dr. Mia Rusmiasari, M.Si, SMK Negeri 13 Bandung luar biasa, saurna. Sakola anu lain ngan saukur ngadidik tapi ogé nganteurkeun lulusanana kana bekerja jeung wirausaha malahan mampuh ngagiringkeun lulusanana digawé jeung nuluykeun sakola ka luar negeri saperti ka China, ka Qatar jeung ka Jepang. Kiprah SMK Negeri 13 ogé lain ngan sakadar ngadidik pisik tapi ogé meuseuh tur ngabina karakter peserta didikna jadi jengléngan insan-insan anu saroléh. Salah sahiji kaistiméwaanana nya éta maneuh diumumkeunana para lulusan saurang-saurang berikut tempat digawéna tur kuliahna lamun nuluykeun kuliah. Cindekna, lain sakadar ngaleupaskeun ti sakola tapi ogé sérén-sumérén ka lapangan pekerjaanana. Satemenna kasuksésan téh maranéhna anu pinter ngajawab tangtangan jeung ngawujudkeun peluang (lolongkrang). Alatan éta, jengtulan guru lain sakadar narima jeung ngajalankeun instruksi ti kepala sakola tapi ogé pionir anu diharepkeun tuwuhna lolongkrang pausahaan. Hiji anu jadi kareueus guru, saur Bu Sekdis nyatana kasuksésan siswa-siswina tangtu dina ajén akademis jeung non akademisna.
Pidangan vocal grup
Pidangan Tari Topéng Bobodoran ti guru SMKN 13 Kota Bandung
Pidangan Seni Karawitan
Pidangan Angklung
Dunga turta harepan Bu sekdis, mugia SMK Negeri 13 Bandung sapapaosna mawa seungit sakola, guru-guru turta almamaterna satatar kota Bandung hususna. Numutkeun guru kimia turta Wakil Manajemen Mutu, Dra. Eén Rohaéni anu dihaminan ku Waka. SDM & Pembangunan, Aam Siti Nurrohmah, S.T, SMK Negeri 13 anu mrogramkeun 4 taun pelajaran widang analis kimia satahap jeung D1 kalawan gawé bareng jeung pihak polban turta puguh papayung hukumna (legalisasi-na). Bu Eén kebek harepan sangkan para lulusan SMK Negeri 13 Bandung leubeut wawanén dina nanjeurkeun bebeneran, percaya diri, jujur turta soléh di unggal gerak lampah kahirupanana. Ku kituna lain ngan saukur digawé dipiharep tina pangalaman gawéna mampuh nyiptakeun produk.
Geura urang kenalan jeung saurang alumni SMK Negeri 13 lulusan taun 2013 jurusan analis apingan Bu Eén, Restu Muh. Irvan urang Balééndah anu karék sabulan mulang ti nagri Jepang (April 2015-April 2016). Numutkeun Restu, saméméh miang ka Jepang dirina digodog heula pangaweruh Basa Jepang salila 5 bulan diteruskeun program pelatihan militér salila 4 bulan. Sabaraha honor perbulanna salila latihan jeung gawé di Jepang téh? Sora ngaheureuyan. 150 rébu yén non bonus, Restu némbalna bari seuri. Mun dirupiahkeun mah cenah satara jeung 15 juta. Kamandang Restu, kaunggulan SMK Negeri 13 nyindekel dina kadisiplinan keur pokus ngudag peluang digawé atawa diajar di luar negeri. Ku kituna kacida pisan pengkuh nerapkeun ajén-inajén pangaweruh. Sapoé henteu sakola bisa leungiteun sa-bab pangajaran, kitu ceuk Restu.
Muldan nu kungsi mapaésan cover Majalah Sora
Dillard
Elgiani
Restu alumni SMKN 13 KotaBandung, nu kungsi ka Jepan. Ayeuna didamel di PT. Rockpaint, pausahaan Jepang perwakilan Indonesia
Méméh mungkas, Sora kenalan heula jeung tilu peserta didik pinunjul wawakil wisudawan-wisudawati, Muldan Halim Pratama kelas XIII Ak 5, ti Ujungberung, jajaka nu kungsi mapaésan cover Majalah Sora, anu rék nuluykeun kuliah ka IPB. Dillard Satria Putra, kelas XIII Ak 2 ti Cipadung. Elgiani Yassifa Yuli Nurinsani kelas XIII Ak 3 ti Riung Bandung, Elgi kitu nénéhna rék neruskeun studi ka IPB. [MS]***
