Essien keur reureuh, mangsa latihan di Lapang Lodaya Bandung
majalahsora.com – Michael Essien kacida reuwasna, mangsa nempo bobotoh nu ngarébu dina latihan munggaranana di Lapang Lodaya, Kemis pasosoré (30 Maret 2017). Keur manéhna mah pangalaman nu teu ilahar, dilalajoan kawas kitu téh. Da can kungsi kaalaman ku Essien méméhna mah. Pangpangna basa maén di klub Bastia, Lyon, Chelsea, Real Madrid, AC Milan jeung Panathinaikos.
“Luar biasa anemo bobotoh téh, salami di Persib Bandung, sim kuring rumaos bingah. Pokona mah ok,” saur Essien sabada reureuh latihan.
Ma’lum wé lamun antusias bobotoh téh kacida badagna. Méméh aya Essien gé, lamun Persib keur latihan téh, réa bobotoh nu lalajo. Komo ayeuna aya Essien, nu kacaturkeun pamaén kelas dunya. Pamaén nu geus asak ku pangalaman, maén di liga top. Di sagigireun éta pamaén teureuh Ghana téh kungsi ngasaan jadi juara Liga Inggris, juara Liga Champion Eropa, maén di Piala Dunia, jrrd.
Merulna bobotoh nu datang ka Lapang Lodaya téh, lantaran hayang meupeuskeun kapanasaranana. Hadéna sikep Essien téh, kaasup nu soméah, keur pantar pamaén béntang mah. Dina sela-sela latihan, sakapeung sok seuri ka bobotoh.
Sanajan kitu, sacara kaamanan mah, kasalametan Essien di Persib téh diprioritaskeun pisan. Eta wé réa body guard nu ngajaanana. Di nagara nu geus maju maénbal jeung ligana téh, pangamanan kawas kitu kaasup nu hal nu ilahar, alatan bising ngarugikeun tim, nu geus mayar mahal. [MS]***
