Michael Essien, baris maen di Persib salila samusim
majalahsora.com – Sobat Sora, pamaén Madrid jeung Chelsea manten, Michael Essien resmi ngagabung jeung punggawa Persib Bandung. Diumumkeun poé Salasa 14 Maret 2017, di Graha Persib, sakalian méré kado milangkala Persib Bandung nu ka-84 taun.
Essien salah sahiji legenda Chelsea téh (34 taun), di Persibna bakal maké nomer 5. Dikontrak salila samusim. Opsina lamun kapaké ku Persib baris diperpanjang deui kontrakna téh.
“Waragad kanggo ngontrak Essien téh, kirang ti Rp. 10 miliar,” saur Pa Teddy Tjahyono, Direktur keuangan PT. Persib Bandung Bermartabat.
Tujuan Persib ngontrak pamaén kelas dunia, teu lian keur ngaronjatkeun ajén inajén jeung préstasi Persib Bandung. Salian ti éta dipiharep bisa népakeun skill-na ka pamaén Persib hususna nu ngarora tur ngamajukeun sepak bola Indonésia. [MS]***
