Drs. Dadang Yani Zakaria, Kepala SMAN 1 Bandung
majalahsora.com, Kota Bandung – Pikeun kepala sakola tangtu waé lain tugas nu énténg-énténg dina numuwuhmekarkeun sakola nu dipingpinna téh. Kudu boga rarancang nu asak jeung motékar, dibarengan ku sabar-tawakal, bari jeung loba amal, ngarah teu taak jeung aral ngokolakeun dunya atikan mah.
Hal ieu kaalaman ku Drs. Dadang Yani Zakaria, Kapala SMAN 1 (SMANSA) Bandung nu anyar mingpin SMAN 1 Kota Bandung. Anjeunna kakarara sabulan leuwih mingpin sakola menengah nu kawentar ku alumnina nu geus jaradi pajabat jeung artis téh, kayaning; Ganjar Kurnia, Réktor Unpad manten, Ujo P Project, Harry Roesli (suargi), jrrd. Méméhna, kepala sakola nu resep kana seni téh, kungsi mingpin SMAN 4 jeung SMAN 21 Bandung.
Tapi wondening kitu, tangtu waé Dadang gé boga jurus-jurus jetu pikeun ngamajukeun sakola nu kiwari dipingpinna. Lian ti neruskeun program nu geus aya, anjeunna dibantuan ku wakasek, guru, tata usaha tur karyawan SMAN 1, ngararancang program nu sakirana hadé diterapkeun di sakola. Nu ahirna sabada diimeutan, sakabéhna sapuk sacara prinsif, kudu pokus heula méré lolongkrang (memfasilitasi) ka para siswa. Katambah kiwari pamaréntah keur haneut-haneutna ngahangkeutkeun program nu ngamuat pendidikan karakter.
Dra. Hj. Supriatin, Wakasek Kesiswaan
Pendidikan karakter téh, cék Dadang, mangrupa program nasional nu kudu dirojong ku saréréa. “Ari penguatan pendidikan karakter tangtuna ngamuara kana tungtutan kurikulum, di mana éta kurikulum téh aya opat kompetensi nu ditungtut bisa nepi ka para siswa. Tuntutan kompetensi nu ka-1. Siswa kudu loba syukuran kana sagala ni’mat nu parantos dipaparinkeun ku Alloh SWT (Habluminalloh). 2. Siswa kudu bisa milu aub (sosialisasi) jeung masyarakat (habluminannas), kumaha carana sangkan siswa bisa ngajénan ka sepuhna, ka guruna, kitu deui ka adi jeung lanceuk entraganana di sakola. Tah nu ka-3 kakara kognitif (pangaweruh) sarta nu ka- 4. Kaparigelan (keterampilan),” pokna.
Tah penguatan pendidikan karakter ieu tangtu waé cék Dadang téh, kudu didarmabaktikeun kana wangun program-program gawé nu geus nyampak. Sok komo jadi kacapangan di SMAN 1 Bandung. Upamana waé “pangajian”, kahareupna tangtu bakal leuwih dihangkeutkeun deui sarta “dipoles” sangkan kaala mangfaatna ku para siswa. Kitu ogé potensi siswa bakal terus dikali, laju kreatifitasna bakal dikamalirkeun kana wangun kagiatan gedé nu geus aya di SMAN 1 Bandung. Salah sahijina dina hajat gedé SMAN 1 Bandung, nya éta Fiesta Boom, nu lumangsung tilu taun sakali tur aya pukuat pakaitna jeung penguatan pendidikan karakter nu kudu dirojong ku saréréa.
Dra. Hj. Ida Romdoniati, Wakasek Humas
Fiesta boom ieu, nurutkeun Wakil Kepala Sekolah Widang Kesiswaan, nya éta Dra. Hj. Supriatin, mangrupa kagiatan akademik, program gawéna OSIS, nu memper-memper Pasar Seni ITB. Lumangsung tilu taun sakali. Nu dipintonkeun dina acara kasabit téh, teu ngan saukur ti pihak luar baé, tapi sakabéh kréatifitas tina program éskul nu aya di SMAN 1 Bandung gé dipagelarkeun, sangkan siswana lega luangna (pangalamanana).
Nu dipintonkeun utamana seni jeung kagiatan sosial boh di masarakatna atawa di sakola, saperti program sosial ka para siswa RMP (Rawan Melanjutkan Pendidikan, aya 220 siswa) nu mémang butuh bantuan.
Seja Ngahangkeutkeun Deui Budaya Sunda
Nalika SMA 1 Bandung dikokolakeun ku Disdik Kota Bandung, di ieu sakola nu pernahna di Jalan Ir. H. Djuanda, Dago téh, geus maneuh saminggu sakali aya “MILATINA”, nya éta pagelaran seni Sunda dina acara Car Free Day Dago, nu dirintis ku sababaraha urang kepala sakola di Bandung. Nu ngeusi acarana gé lain siswa SMA waé, tapi SD, SMP jeung SMK gé milu aub ngamumulé kasenian-kabudayaan Sunda. Ngan waé ti saprak dicekel ku propinsi, éta kagiatan téh kateug.
Drs. Wahria, M.M., Wakasek Sarana
“Tah engké ka payunna mah insya Alloh baris dihangkeutkeun deui. Badé diadumaniskeun sareng pagelaran rutin nu tos aya. Nya supados teu bosen mah dua minggu sakali atuh lumangsungna. Tangtos waé kalayan idin ti Pa Ahmad Hadadi, Kepala Dinas Pendidikan Propinsi Jabar. Da ti Kepala BP-3 Wilayah IV, nya éta Pa Dédé Amar mah, tos nyatujuan, kantun nangtoskeun waktosna,” kitu cék Dadang téh.
Dra. Rosi Rahayu, M.M., Wakasek Kurikulum
Dina tungtung obrolan, Dadang ngaharewos ka Sora . “Sangkan siswa janten pinter téh gampil ayeuna mah, kantun mencét hapé android, browsing dina google. Kitu deui ahlak prilaku siswa, tos kaasah ti TK dugi ka SMP, karakterna tos kabentuk. Tapi upami aya siswa nu badeur, bengal, bedang, basangkal, nya kedah tiasa-tiasa ngalelempengna. Margi pami guru kirang tiasa ngalelempengna mah tiasa-tiasa ngabeletok potong,” kitu cék kepala sakola nu soméah tur hadé ka sémah téh, mungkas wangkongan. [Asép GP]***
