Drs. Agustia, M.Pd., Kepala SMAN 1 Cilaku, Kab. Cianjur
majalahsora.com, Kabupatén Cianjur – SMAN 1 Cilaku, pernahna di Jalan Perintis Kemerdekaan No. 12, Désa Sirnagalih, Kecamatan Cilaku, Kabupatén Cianjur. Ti taun 2014 dipingpin ku Drs. Agustia, M.Pd. Patalina jeung PPDB taun 2017 ayeuna, ieu sakola téh, baris nampa 432 siswa anyar, nu diwadahan di 12 kelas, hartina dina sakelas ngawadahan 36 siswa. Sistem pendaftaranana ngaliwatan jalur non akademik jeung akademik.
Siswa nu katarima ngaliwatan jalur non akademik tur geus daftar ulang téh, aya 122 urang, ngawengku jalur undang-undang guru aya 10 urang sésana siswa RMP. Nu ngaliawatan jalur MoU mah, euweuh nu daftar. Lamun nilik kana kuota siswa non akademik, kuduna mah nampa 170 siswa.
Pa Mukti Taufikurahman, Waka Kesiswaan SMAN 1 Cilaku nu ngarangkep jadi panitia PPDB ieu sakola
“Kumargi jalur non akademik teu minuhan kuota, mangka sésana baris dieusian ku siswa nu daftar ngalangkungan jalur akademik. Insya Alloh, dina PPDB ayeuna baris nampi 432 siswa anyar. Kaleresan kuota PPDB non akademik teu kalebetan sadaya kuotana téh, ku kituna engkéna baris dieusian ku siswa nu katampi ngalangkungan jalur akademik, nya éta 310 siswa deui,” saur Drs. Agustia, M.Pd., di rohang damelna.
Proses PPDB jalur akademik di SMAN 1 Cilaku, lumangsung ti poé Senén ping 3 Juli nepi ka poé Saptu ping 8 Juli 2017. Mangsa poé kahiji aya sababaraha kendala nu disanghareupan ku panitia PPDB SMAN 1 Cilaku, pangpangna basa nga upload data ka server PPDB Prop. Jabar, sakapeung loading jeung jaringanana pegat. Sanajan kitu data siswa nu daftar téh tetep bisa ka upload ku tim PPDB SMAN 1 Cilaku.
Kampus SMAN 1 Cilaku nu pernahna di Jl. Perintis Kemerdekaan no. 12, Kab. Cianjur
“Patalina sareng kagiatan sacara online, SMAN 1 Cilaku tos biasa ngalaksanakeun kagiatan nu aya pakuat pakaitna sareng jaringnan internet, tos dua kali ngalaksanakeun UNBK sacara mandiri. Kitu ogé dina kagiatan UKG sacara online, salami éta Alhamdulillah lancar baé taya masalah, utamana jaringan internet sareng fasilitas IT-na. Pami nilik kana masalah jaringan internet PPDB ayeuna, sim kuring salaku Kepala SMAN 1 Cilaku, ngama’lum kana hal kasabit nu disanghareupan ku Dinas Pendidikan Prop. Jabar, alatan munggaran ngokolakeun PPDB SMA/SMK negri sa-Jabar, utamana mah masalah jaringan internet jeung serverna, ku sabab réana SMA/SMK negri sa-Jabar nu nga upload data sacara rempeg. Alhamdulillah sanaos aya sababaraha masalah, tetep nu daftar mah tos ka upload ka server PPDB Prop. Jabar,” Pa Agustia, ngécéskeun.
Nu milih SMAN 1 Cilaku, jadi pilihan kahiji dina PPDB
Kacatet nepi ka poé Kemis, 6 Juli 2017, nu daftar langsung tur milih SMAN 1 Cilaku jadi pilihan kahiji téh, aya 239 urang. Di sagigireun éta aya 150 siswa limpahan ti sakola séjén nu milih SMAN 1 Cilaku jadi pilihan kadua.
“Pami nilik nu daftar, tur milih SMAN 1 Cilaku janten pilihan kahiji, kirang langkung aya 239 urang, mung hawatos teras kadeseh ku siswa limpahan nu daftar ka SMAN 1 sareng SMAN 2 Cianjur nu jadi pilihan kahijina. Mudah-mudahan pami katampi aranjeunna panjeg sakola di SMAN 1 Cilaku,” saur Pa Mukti, Waka Kesiswaan, SMAN 1 Cilaku, nu jadi Ketua PPDB di SMAN 1 Cilaku.
Panitia PPDB SMAN 1 Cilaku, Kab. Cianjur
Salian ti sibuk nyanghareupan PPDB taun ayeuna, Pa Agustia, salaku Kepala SMAN 1 Cilaku gé keur getol ngaronjatkeun kualitas guru-guruna, nu jumlahna aya 65 urang. Hal kasabit téh geus dilaksanakeun ti taun-taun ka tukang, ngan keur kamajuan sakola mah, Pa Agustia teu pegat ngayakeun kagiatan IHT, pelatihan jeung nu lianna. Dina dangka waktu nu teu lila deui, nya éta ping 10 Juni 2017, guruna baris diilukeun dina kagiatan IHT salila tilu poé.
Méré pelayanan optimal
“Insya Alloh pikeun ngaronjatkeun SDM guru SMAN 1 Cilaku, dinten Senén ping 10 Juni 2017, baris aya IHT (in house training) tempatna di sakola tur pematerina ti Balai tur Instruktur ti Disdik Prop. Jabar. Tujuanana tangtos kanggo ngaronjatkeun SDM tur kualitas peserta didik SMAN 1 Cilaku,” pokna.
Pa Agustia gé miharep saprak SMA/SMK dikokolakeun ku Dinas Pendidikan Propinsi Jabar, dunya atikan di Jabar bakal leuwih maju deui. [SR]***
