Drs. H. Karyono, M.Si. Kepala Bidang Pendidikan dan Tenaga Kependidikan Paud Dini dan Dikdas, Disdik Propinsi Jawa Barat
majalahsora.com – Sobat Sora, Jumat ping 10 Pebruari 2017, Majalah Sora ngahaja nepungan Drs. H. Karyono, M.Si. Anjeunna téh, Kepala Bidang Pendidikan dan Tenaga Kependidikan Paud Dini dan Dikdas. Eta téh struktur anyar nu aya di lingkungan Dinas Pendidikan Propinsi Jawa Barat. Tugasna nya éta ngokolakeun ngeunaan kepegawaian di lingkungan Dinas Pendidikan Jawa Barat.
Saprak SMA jeung SMK dikokolakeun ku Dinas Pendidikan Propinsi Jawa Barat, aya sababaraha rencana nu baris dilaksanakeun ku ieu lembaga téh. Di antarana ngarotasi jeung ngamutasi Kepala Sekolah SMA jeung SMK Negri di sa-kuliah Jawa Barat.
Salian ti hal éta ogé baris nyeleksi calon kepala sekolah anyar. Pangna kituna téh alatan réa sakola nu euweuh kepala sekolahna, pédah geus pangsiun, tilar dunya, jeung réa-réa deui. Eta hal téh kaalaman ku sakola Sobat Sora téu?
Anyaran dina bulan Pébruari 2017, aya sababaraha SMA jeung SMK Negri, nu dipingpin ku kepala sekolah Plt (pelaksana tugas) hartina henteu definitif atawa sementara. Eta sakola téh dipingpin ku Pengwas SMA jeung SMK. Nu tugasna kira-kira sabulan, duabulan.
Ayeuna Dinas Pendidikan Propinsi Jawa Barat keur riweuh ngagodog kepala sekolah jeung calon kepala sekolah, nu baris dirotasi jeung mutasi. Syarat nu rék jadi kepala sekolahna, kudu minuhan syarat nu luyu jeung Permendiknas, salah sahijina geus boga Surat Tanda Tamat Pendidikan dan Pelatihan ti Lembaga Pengembangan dan Pemberdayaan Kepala Sekolah (LPPKS) Indonésia.
Kurang leuwih aya 300-an leuwih calon kepala sekolah anyar nu baris dipeunteun ku tim nu nyeleksina téh keur nempatan 61 SMA jeung SMK nu can aya kepala sekolahna, kaasup salapan SMA jeung SMK anyar nu sumebar di Jawa Barat.
Salah sahijina nu nyeleksina nya éta ku Kepala Bidang Pendidikan dan Tenaga Kependidikan Paud Dini dan Dikdas, nya éta Bapa Drs. H. Karyono, M.Si. Engkéna satutas lulus seléksi, baris dilantik ku Gubernur Jawa Barat Bapa Ahmad Héryawan. Sabada éta, kakara di tempatkeun di sakola nu can aya kepala sekolahna.
“Kagiatan rotasi sareng mutasi kepala sekolah SMA, SMK di lingkungan Dinas Pendidikan Propinsi Jawa Barat, baris dilaksanakan dina waktos nu moal lami deui. Kira dina anggang sasasih, duasasih. Satutas diseleksi ku tim penyeleksi kepala sekolah SMA sareng SMK. Kepala sekolah nu harita tos dikukuhkeun ku Bupati sareng Walikota téh, wayahna kedah diseléksi deui, dugi ka dikukuhkeun ku Gubernur Jawa Barat. Pengawas SMA, SMK nu minuhan persyaratan janten kepala sekolah gé, aya bahan tiasa diangkat janten kepala sekolah deui,” kitu saur H. Karyono, salaku Kepala Bidang Pendidikan dan Tenaga Kependidikan Paud Dini dan Dikdas téh.
Kabéh tarékah nu eukeur jeung eudeuk dilaksanekun ku Dinas Pendidikan Jawa Barat téh tangtu boga tujuan nu hadé, di antarana keur ngawajudna dunya atikan nu maju pikeun Jabar Kahiji. [MS]***
