Siswa anyar SMAN 1 Dayeuhkolot Kabupatén Bandung
Kabupatén Bandung – Sobat Sora, poé Senén tanggal 18 Juli 2016, taun ajaran anyar resmi lumangsung di sa-kuliah Indonésia. Rempeg, munggaran asup sakola, ti TK, SD/MI, SMP/MTs nepi ka SMA/SMK/MA, kaasup di Kabupatén Bandung
Poé éta kénéh majalah Sora ngahaja nguriling ka sababaraha sakola nu aya di lelewek Dayeuhkolot jeung Balééndah. Nyimpang ka SMK Télkom, SMA Télkom, SMAN 1 Dayeuhkolot, SMKN 3 Balééndah, SMKN 2 Balééndah, SMK & SMA Karya Pembangunan (KP) Balééndah, sarta SMP, SMA jeung SMK BPPI. Tujuanana teu lian keur nalungtik jumlah peserta didik di sakola kasabit.
Ampir di unggal sakola nu dijugjug ku Sora, jumlah siswa anyarna rata-rata naék ti batan taun méméhna. Sanajan aya ogé nu nyirorot, ngan jumlahna teu signifikan. Siswa anyar di SMK Télkom aya 283 siswa taun méméhna 250 siswa. SMA Télkom aya 300-an siswa, méméhna kurang ti éta, SMAN 1 Dayeuhkolot aya 460 siswa méméhna kurang ti éta, SMKN 3 Balééndah aya 420 siswa, méméhna kurang ti éta, SMA KP Balééndah aya 111 urang méméhna 120-an, SMK KP aya 265 urang, méméhna kurang ti éta, SMKN 2 Balééndah aya 530 urang méméhna 420 siswa, SMP BPPI aya 215 urang méméhna 240 siswa, SMA BPPI 120 urang méméhna 130 siswa, sarta SMK BPPI aya 189 méméhna 180 siswa.
“Siswa baru di SMKN 3 Balééndah dina taun ajaran 2016-2017 aya 426 siswa, naék 80 urang. Numutkeun Bapa mah, kaayaan kieu téh walatra di saban sakola hususna tingkat SMP, SMA sareng SMK. Ampir sakola nu aya di sabudeureun Balééndah, siswana ngaronjat langkung seueur ti batan taun kamari. Nilik kituna mah, kasadaran warga kanggo neraskeun pendidikan ka jenjang luhureunana tos mingkin saé,” saur Drs. Taufik Hidayat, Waka. Kesiswaan SMKN 3 Balééndah. [MS]***
