Pa Jokowi Presiden RI disarengn ku Wagub Jabar, Pa Deddy Mizwar, dina kagiatan Kurker (kunjungan kerja) di SMPN 2 Kota Tasikmalaya, ngabagikeun KIP ka 1500 siswa yatim/panti (poto Kang Dudi Humas Prop. Jabar)
majalahsora.com – Poé Juma’ah, ping 9 Juni 2017, Pa Jokowi, Présidén RI, ngadongdon ka SMPN 2 Kota Tasikmalaya, dina raraga kagiatan kunjungan kerja. Di sakola kasabit Pa Jokowi ngabagikeun 1.500 Kartu Indonesia Pintar (KIP). Nu dibagikeun ka siswa yatim/panti, ti tingkat SD nepi ka ka tingkat SMA/SMK.
Totalna mah SD aya 575 siswa, SMP 238 siswa, SMA 133 siswa sarta SMK, lobana 340 siswa. Sedengkeun keur kelompok diajar aya Paket A, lobana 40 urang, Paket B, 61 urang, sarta Paket C aya 113 urang.
Engké saban bulanna, para siswa nu nampa KIP téh, baris nampa duit bantuan keur kapereluan diajar. Pikeun jenjang SD, engkéna meunang waragad Rp. 450 rébu, SMP Rp. 750 rébu, SMA jeung SMK meunang Rp. 1 juta.
“Sim kuring miharep, dana anu aya dina ieu kartu téh, dianggo kanggo kapereluan anu aya patalina sareng sakola tur atikan. Tiasa digaleuhkeun buku, saragam, sapatu, jsb-na,” saur Pa Jokowi, ka para siswa nu narima KIP téh.
“Lamun kanggo ngagaleuh pulsa kenging henteu? Jangji nya, lamun aya anu digaleuhkeun pulsa, kartu ieu engkéna baris dicabut deui,” pokna deui.
Di sagigireun éta Pa Deddy Mizwar, Wakil Gubernur Jawa Barat anu nyarengan Présidén téh, harita nganuhunkeun ka Pa Jokowi, anu tos sumping tur blusukan ka Tasikmalaya jeung Ciamis, salila dua poé. Salian ti masrahkeun KIP, Pa Jokowi gé ngabagikeun Kartu Indonesia Séhat (KIS), bantuan paket sembako, bantuan tuangeun tambahan, sarta bantuan Program Keluarga Harapan (PKH).
“Dina ieu kasempetan, sim kuring seja nganuhunkeun ka Pa Presiden, sumping ka Kabupaten Tasikmalaya, Kota Tasikmalaya sareng Ciamis. Dina raraga ngabagikeun KIP, Kartu Indonesia Séhat, lajeng masrahkeun bantuan sembako sareng tuangeun tambahan. Salian ti éta, oge masrahkeun sertipikat hak atas tanah, ka para panarima mangpaat. Teu kakantun hiji deui nu istimewa nya éta Program Keluarga Harapan,” saur Pa Deddy Mizwar téh.
Sabada réngsé masrahkeun sertipikat, Pa Jokowi anu disarengan ku sababaraha urang Menteri Kabinet Kerja, Wagub Jabar, sarta rombonganana, laju Juma’ahan di Masjid Agung Kota Tasikmalaya. Satutas éta, Pa Jokowi, ngajugjug ka UPTD Puskesmas Cilembang, Jalan Cieunteng, Cihideng, Kota Tasikmalaya. Di éta tempat Pa Jokowi ngabagikeun paket Sembako, kayaning; béas, lisah sayur, gula, entéh, sarta ngabagikeun Pemberian Makanan Tambahan atawa PMT. [MS-Humas Prop. Jabar]***
