Pa Deddy Mizwar, Wagub Jabar nuju nyarengan Pa Jokowi Presiden RI mangsa Kurker (kunjungan kerja) ka Tasikmalaya (poto Kang Dudi Humas Prop. Jabar)
majalahsora.com – Basa poé Juma’ah (9 Juni 2017) aya 2.359 urang warga Jawa Barat nu meunang sertipikat tanah ti pamarentah pusat. Eta sertipikat tanah téh mangrupa hak masarakat sacara hukum nu jadi bukti sah, kapimilikanana.
Sertipikat kasabit téh dipasrahkeun sacara langsung ku Presiden RI Joko Widodo (Jokowi) dina acara Penyerahan Sertifikat Hak atas Tanah Program Strategis Nasional, Pembinaan, Fasilitasi, sarta Kerjasama Akses Reform di Balaikota Tasikmalaya, Jalan Letnan Harun No. 1.
Pa Jokowi Presiden RI, dina kagiatan Penyerahan Sertifikat Hak atas Tanah Program Strategis Nasional, Pembinaan, Fasilitasi, sarta Kerjasama Akses Reform di Balaikota Tasikmalaya, Jalan Letnan Harun No. 1. (poto Kang Dudi Humas Prop. Jabar)
Kagiatanana diluuhan ku Wakil Gubernur Jawa Barat, nu sakalian nyarengan Presiden RI. Dina éta kasempetan, Pa Demiz nganuhunkeun ka Pa Jokowi, alatan parantos masrahkeun sertipikat kasabit ka masarakat Jabar . Anjeunna miharep ku program pamasrahan sertipikat téh, bisa méré mangpaat keur balaréa.
“Pangemut sim kuring mah, insya Allah nu nampi sertifikat téh baris nampi mangpaatna, ku kituna tiasa ngaronjatkeun SDM tur karaharjaanana,” saur Pa Demiz dina pangbagéana.
Pa Deddy Mizwar, Wagub Prop. Jabar nuju biantara dina kagiatan Penyerahan Sertifikat Hak atas Tanah Program Strategis Nasional, Pembinaan, Fasilitasi, sarta Kerjasama Akses Reform di Balaikota Tasikmalaya, Jalan Letnan Harun No. 1. (poto Kang Dudi Humas Prop. Jabar)
Nu nampa sertipikat tanah téh, jolna ti 11 kabupaten/kota. Di antarana; Kota Tasikmalaya (315 urang), Kabupaten Tasikmalaya (314), Kabupaten Ciamis (400), Kota Banjar (525), Kabupaten Pangandaran (275), Kabupaten Garut (300), Kabupaten Karawang (115), Kabupaten Cirebon (100), Kabupaten Cianjur (100), Kabupaten Sumedang (59), sarta Kabupaten Bekasi (50 urang).
Presiden Jokowi nétélakeun yén sertipikat tanah kasabit téh hal anu penting. Alatan réa masalah nu patalina jeung sengketa tanah, nu tungtungna mah jadi barabé tur bangga mémérésna, ku sabab teu boga sertipikat tanah.
Pa Jokowi Presiden RI nuju masrahkeun sertipikat tanah
“Ku lantaran kitu, kiwari pamarentah ngajurung sangkan sagancangna, lahan anu tacan ngabogaan sertipikat, kudu sagancangna disertipikatan,” saur Pa Jokowi.
Kacatet aya 126 juta, lega lahan (widang tanah) di sakumna Indonesia téh. Ngan, kakara 46 juta lahan anu geus disertipikatan. Sedengkeun di Jawa Baratkira-kira aya 19,8 juta lega lahanna téh, nu geus disertipikatan kakara 6,4 juta-na. Ku kituna pamarentah, ngaliwatan Kementerian ATR/BPN dina taun ayeuna nargetkeun bisa nyertifikasi 5 juta lahan. [MS-Humas Prop. Jabar]***
