Deddy Mizwar, Wagub Jabar, nuju ngaraosan jeruk dekopon
majalahsora.com, Kabupatén Bandung Barat – Patalina jeung judul di luhur, Kemis isuk-isuk, 7 Séptémber 2017, sakola nu dipingpin ku Dr. Siti Sadiah Yuningsih, M.M. Pd., téh, katatamuan Wagub Jabar, Deddy Mizwar (Demiz), dina raraga kunjungan kerja anjeunna, disarengan ku Drs. Dédé Amar, M.M.Pd., Kepala BP 3 Wilayah IV Dinas Pendidikan Propoinsi Jabar.
Dr. Yuyun, Kepala SMKN Pertanian Lembang, mangsa nyarengan Wagub Jabar
SMKN Pertanian Lembang, nu pernahna di Jalan Tangkuban Parahu, Lembang, Kabupatén Bandung Barat téh, kacatet ngabogaan dua paket keahlian, nya éta Agribisnis Tanaman Pangan Hortikultura jeung Teknologi Pengolahan Hasil Pertanian.
Dr. Yuyun Kepala SMKN Pertanian Lembang, Demiz, Wagub Jabar & Dede Amar, Kepala BP 3 Wilayah IV Disdik Jabar
Mangsa ngobrol jeung Demiz di rohang tamu ieu sakola, Dr. Yuyun, nénéh Kepala SMKN Pertanian Lembang téh, ngadadarkeun program-program sakolana. Salah sahijina, ngeunaan budidaya jeruk dekopon, varietas asli ti Jepang. Di ieu sakola jeruk dekopon téh, hasil dibudidaayakeun ti taun 2015. Eta hal téh teu lésot tina gawé bareng jeung Asép Hidayat, patani nu sukses ngabudidayakeun jeruk dekopon di Lembang.
Wagub Jabar poto babarengan, Kepala BP 3 Wilayah IV reujeung Kepala SMA/SMK sa Kabupaten Bandung Barat
Kacatet nepi ka kiwari geus aya 55 tangkal jeruk dekopon nu dipelak di jero green house. Green housena, bantuan ti Gubernur Jawa Barat, nu réngsé diwangun taun 2016 kaliwat. Mangsa usum panén, dina satangkal bisa ngahasilkeun 40 kg buah.
Poto sareng siswa SMKN Pertanian Lembang
“Alhamdulillah, jeruk dekopon ti nagara sakura téh tiasa dibudidayakeun di SMKN Pertanian Lembang, tos diuningakeun ka Pa Demiz, sateuacanna tos diuningakeun ka Gubernur Jabar tur ka kementrian. Tangkalna dipelak di lebet green house nu mewah, kanggo pantar SMK sa-Indonésia,” cék Dr. Yuyun, Kepala SMKN Pertanian Lembang téh.
Demiz gé harita nyobaan langsung jeruk dekopon, samalah manén buahna langsung ti tangkal jeruk dekopon nu aya di jero green house. Jeruk dekopon téh bisa buahan sapapanjang taun.
“Rasa jeruk dekopon dilebet baham téh, lep yes wéh, seger, haseum amis pokona mah mantap,” cék Demiz satutas nyobaan jeruk dekopon.
Mangsa di green house SMKN Pertanian Lembang
Aya dua jenis rasa buah jeruk dekopon, lamun tangkal jeruk dekopon nu dipelak di taneuh 800 dpl (di atas permukaan laut) mangka rasa jerukna haseum amis, sedengkeun lamun anu di pelak di taneuh di handap 800 dpl, mangka rasana amis.
Keur pemasaran jeruk dekoponna, SMKN Pertanian Lembang geus teu hésé masarkeunana, alatan geus aya supermarket nu baris narima hasil panénna, samalah bisa ogé di ekspor ka nagara deungeun. Nilai ékonomisna gé luhur dina sakilo bisa dihargaan Rp. 100.000 nepi ka Rp. 120.000.
Mangsa panen munggaran jeruk dekopon
Patalina kénéh jeung SMKN Pertanian Lembang, Demiz salaku Wagub Jabar muji kana program-program nu geus aya di sakola kasabit. Di antarana ieu sakola téh ngamekarkeun SMK berbasis pasantrén atawa boarding school, alatan aya sababaraha siswana nu mondok di asrama. Salian ti diajar saperti sakola umum, siswana oge diajar kaagamaan, mangsa mulang sakola. Salian ti éta geus ngamekarkeun paket ngeunaan entrepreuneur, siswana diatik jadi pangusaha.
Demiz dipoto jeung salah sahiji petugas nu ngarawat jeruk dekopon
“Insya Alloh pakét di SMKN Pertanian di Lembang baris dimekarkeun jadi sapuluh. Ayeuna salian ti berbasis pasantrén ogé entreupreuneur. Engkéna, ku Pamaréntah Prop. Jabar baris dideudeul sacara kateterusan, alatan siswa ieu sakola geus bisa ngahasilkeun produk-produk pertanian, sangkan jadi ahli pertanian nu jadi pangusaha suksés. Lamun tiasa tong jadi pagawé. Dina hal waragad Insya Alloh baris disupport ku koperasi tur UKM, ambéh akses keuangan lancar, alatan sacara ilmu pertanian para siswa tos ngawasa. Salian ti cara masarkeun sacara konfensional ogé kedah dideudeul ku cara digital,” cék Demiz téh. [SR]***
