Bubuka Bulan Kesehatan Gigi Nasional 2017
majalahsora.com, Kota Bandung – Miara kaséhatan gigi (waos) téh kacida pentingna pikeun masarakat. Jiga nu sapélé tapi pibahlaeunana gedé. Dampak tina kasakit gigi nu parna bisa ngabalukarkeun inpeksi mata jeung kasakit jajantung. Ku kituna Fakultas Kedokteran Gigi (FKG) Universitas Padjadjaran Bandung salaku akademisi taya reureuhna ngayakeun édukasi ka masarakat sangkan miara kasehatan gigi sarta mulut.
Hal éta ditepikeun ku Dekan FKG Unpad, Dr. Nina Djustiana, drg. M.Kes ka Sora dina sela-sela pembukaan kagiatan Bulan Kesehatan Gigi Nasional (BKGN) 2017 di Jalan Sekeloa Bandung sawatara waktu kaliwat (25/9.2017). Ku kituna dina acara BKGN nu rampak diayakeun di 22 FKG sakuliah Indonesia, FKG Unpad kalayan gawé bareng jeung Pepsodent, ngayakeun pamariksaan gigi geratis, salila tilu poé (25-27/9/2017) pikeum masarakat Bandung jeung sabudeureunana, di RSGM (Rumah Sakit Gigi dan Mulut) FKG Unpad Jl. Sekeloa Selatan I Bandung.
“Unggal taun BKGN teras ngageuing kulawarga Indonesia sangkan rutin mariksakeun kasehatan waosna. Ku kituna fakultas tos nyiapkeun 300 tanaga kaséhatan gigi nu ngawengku para dosén dokter gigi, dokter gigi spesialis sarta mahasiswa FKG Unpad kanggo nyiapkeun layanan kasehatan ka masarakat,” kitu saurna.
Edukasi kasehatan gigi, ulah hilap ngosok waos sadinten dua kali
Sapamedagan jeung hal éta Imelda Wira ti pihak PT. Uniliver (Pepsodent) nyebutkeun yén kagiatan gawé bareng antara pihakna jeung Persatuan Dokter Gigi Indonesia (PDGI) sarta Asosiasi Fakultas Kedokteran Gigi Indonesia (AFDOKGI) nu diayakeun rutin tiap tahun ku pihakna ieu mangrupa wujud komitmén pihakna dina méré panyalindungan kana kasehatan gigi dan mulut masarakat Indonesia.
Kagiatan nu dijejeran “Merdeka dari Gigi Berlubang” ieu tambah ramé ku hadirna mobil keliling nu husus ditujukeun ka daérah PDGI Cabang. Samalah di FKG Unpad mah direuah-reuah ku marching band, badut gigi jeung kasenian angklung .
Imelda Wira, Dr. Nina Djustiana jeung dr.Oke (kénca ka katuhu)
Pikeun miara kaséhatan gigi sacara maksimal tur merdeka tina gigi berlubang, Dr. Nina méré resép pikeun masarakat, utamana barudak nya éta kudu ngalobakeun asupan opieun (camilan) jeung katuangan nu boga tekstur saimbang jeung loba seratna kayaning bungbuahan jeung sayur, “Margi saneskanten opieun atanapi jajanan murangkalih ayeuna mah sapertos permen sareng coklat tos langki nu teksturna lemes tah hal ieu nu ngabalukarkeun murangkalih kirang kalatih ngunyahna. Sabalikna upami tuangeun nu ngandung serat mah bakal lami dikunyahna. Gerakan ngunyah ieu penting kanggo ngarangsang aliran kelenjar ludah, pembersih alami nu tiasa nganetralisir keasaman rongga mulut alatan seueur nuang katuangan nu amis sareng cepel,” kitu saurna tandes.
Jenis opieun barudak saperti coklat, pastry jeung permen cék Imelda, memang bisa ngabalukarkeun bolongna waos barudak.
Dr. Nina, drg, Oke katut Imelda Wira miharep kagiatan ieu aya gunana pikeun kasehatan gigi dan mulut masarakat Indonesia, hususna di Jawa Barat jeung urang Sekeloa Bandung. [Asep GP]***
