Keluarga besar Osis & Aktipis SMAN 13 Bandung/SMAN 6 Cimahi manten
majalahsora.com – Pikeun ngaraketkeun tur mageuhan tali silaturahmi, mantan pengurus Osis jeung Aktipis SMAN 13 Bandung/ SMAN 6 Kota Cimahi, poé Salasa 13 Juni 2017, ngayakeun kagiatan buka bersama shaum Romadhon 1438 H. Tempatna di Rumah Bilik, salah sahiji rumah makan nu aya di wewengkon Cihampelas Cililin, Kabupatén Bandung Barat.
“Alhamdulillah tiasa riung mungpulung deui, tos lami teu tepang da ayeuna mah tos sibuk ku padamelan tur urusan lianna. Apan mangsa SMA mah, rumaja kénéh, ayeuna sakalina ngariung nyandak kulawargana. Nu sumping téh kapungkurna aya nu pengurus Osis, anggota Paskibra, PMR sareng Teater. Tujuana mah tangtos supados silih mikawanoh, komo disasih nu Romadhon nu pinuh ku kaberekahan. Aya nu tos teu tepang salami 19 taun,” saur Pa Gusdiana, pengurus Osis tur anggota Paskibraka Kota Bandung tur Jabar manten, bari di haminan, ku Pa Hadi, Pa Wigar, Pa Irwan sareng Pa Ahmad.
Ngaranna gé silaturahmi, sakalina panggih tangtu ngobrolkeun panineungan aranjeunna mangsa SMA. Kitu deui babagi carita mangsa ayeuna.
Kunaon diaranan alumni SMAN 13 Bandung/ SMAN 6 Cimahi, alatan harita mangsa aranjeunna lebet ka sakola kasabit (taun 1995), status tur ngaranna masih SMAN 13 Bandung. Kabéh kagiatan, kayaning Paskibra, PMR, Pramuka, Teater, jsté, lumangsung tur kacatetna di Kota Bandung. Ku sabab tempatna aya di Jalan Melong Raya-Perumnas Cijerah II, Kotip Cimahi nu asup ka Kabupatén Bandung, mangsa pertengahan 1998, salin rupa jadi SMAN 6 Kota Cimahi, kitu sajarah singgetna mah.
Para pengurus Osis jeung Aktipis SMAN 13/SMAN 6 Cimahi téh, basa medio taun 1998 kungsi demo, alatan teu tarima ku parobahan kasabit, pangpangna mah katalian ku sajarah, ieu sakola nu ngadeg basa taun 1978 téh, mangrupa filial ti SMAN 4 Kota Bandung, nu pernahna di Jalan Gardu Jati. Harita demona diliput tur tayang di stasiun TV SCTV. Basa éta aranjeunna meredih sangkan ngaran SMAN 13 tong diganti, nu penting mah pidah wé alamat kampusna.
“Mudah-mudahan kapayunna aya kagiatan sanésna. Insya Alloh baris diprogramkeun. Dinten ayeuna seueur anu absen, alatan nuju aya pamengan. Hatur nuhun ka Bu Ema, salaku owner Rumah Bilik, nu ogé alumni ti SMAN 13/6 Cimahi. Kitu ogé ka Bu Hani sareng Bu Fitri. Pokona mah kedah silih asah, silih asih, silih asuh,” saur Pa Hadi, anggota Paskibraka, Kota Bandung tur Jawa Barat manten téh. [MS]***
