Dr. Elih Sudiapermana, M.Pd., Kepala Dinas Pendidikan Kota Bandung, basa muka kagiatan Pekan Lomba Literasi di SMAN 20 Kota Bandung
Bandung Wétan – Budaya Literasi salah sahiji program Dinas Pendidikan Kota Bandung nu keur haneut-haneutna dilaksanakeun di saban sakola, ti mimiti tingkat SD nepi ka SMA/SMK. Diresmikeun ku Kang Emil, Walikota Bandung di Jalan Ir. Soekarno, poé Kemis 18 Agustus 2016, katompérnakeun. Eta téh dina upaya keur ngaronjatkeun minat baca, nulis sarta budaya literasi lianna di Kota Bandung.
Dr. Hj. Yeni Gantini, M.Pd., Kepala SMAN 20 Kota Bandung
Dra. Hj. Euis, M.Pd., Waka Humas oge Ketua Pelaksana Pekan Lomba Literasi
Guru-guru SMAN 20 Kota Bandung
Patalina jeung kagiatan kasabit, di SMAN 20 Kota Bandung ti béh ditu kénéh geus ngalaksanakeun kagiatan literasi. Januari 2016 ku Pa Odéd M Danial, Wakil Walikota Bandung, di launchingna téh dina acara Eduexspo. Saprak program Budaya Literasi bagulir, ieu sakola mingkin daria ngumplitan koleksi buku bacaanana, pangpangna buku-buku fiksi.
Patandang lomba cipta carita pondok basa Indonesia
Kaayaan di rohang lomba debat basa Sunda
Sangkan ngajadina Budaya Literasi di sakola nu dipingpin ku Dr. Hj. Yeni Gantini, M.Pd, diayakeun lomba literasi. Ngaran kagiatanana téh Pekan Lomba Literasi, lumangsung tanggal 21 Séptember 2016, kaliwat. Di buka ku Pa Elih Sudiapermana, Kepala Dinas Pendidikan Kota Bandung. Nu dilombakeunana aya debat & pidato basa Sunda, cipta puisi & carita pondok basa Indonésia, pidato basa Jepang, debat basa Inggris. Salian ti éta aya ogé lomba literasi kelas, nya éta nyieun sudut baca, pohon baca nu aya risensi buku nu geus di baca, jrrd.
Patandang lomba debat basa Inggris
Patandang lomba cipta puisi basa Indonesia
Basa Pa Elih ngabuka éta kagaiatan, dina biantarana omat-omatan maca téh kacida pentingna. Lain saukur maca bacaan pelajaran, tapi kudu réa macaan buku fiksi. Di kelas gé guru gé diteken kudu bisa ngabagi waktuna, dina sajam pelajaran guru cekap nyarios 10 menit, sésana nu 30 menit keur méré gagasan ka para siswana.
Patandang lomba pidato basa Jepang
“Maca téh aya nu teks aya nu konteks, nu teks kayaning buku, majalah Koran, jsté. Nu Konteks ngeunaan kehirupan, isu-isu, jsté. Nu penting dina maca téh perlu dikomunikasikeun sabada ti éta jadi gagasan boh tulisan boh lisan. Maca teks mah condong fokus ka minat budaya baca teks sarta budaya tulas tulis. Nu dipikamelang, sumber referensi nu kacatet ti bangsa urang téh masih kirang. Egké mah gagasan, pikiran, sarta temuan-temuan urang téh, bisa dijadikeun referensi. Ulah nepi ngajelaskeun ngeunaan kabudayaan, kaolahan, sajarah di Bandung, Sunda hususna, referensina jolna ti bangsa deungeun,” saur Pa Elih. [MS]***
