Andir – Poé Salasa (5 Juli 2016) pabeubeurang majalah Sora ulin ka SMA Pasundan 7 Kota Bandung. Ieu sakola tatanggaan jeung SMA Pasundan 3 Kota Bandung. Perenahna di Jalan Kebon Jati No. 31, Kelurahan Kebon Jeruk, Kecamatan Andir.
Drs. Agus Setiana, M.Si., (acuk bulao), Kepala SMA Pasundan 7 Kota Bandung dipoto sareng panitia PPDB (Penerimaan Peserta Didik Baru) kénca ka katuhu: Pa Pupung, Pa Eka Setia, Bu Riska & Pa Wahyu, S.Pd.
Dina taun ajaran 2016-2017 target siswa anyarna, nya éta 216 urang keur genep kelaseun. Kurang leuwih nepi ka ayeuna geus aya 92 urang nu daftarna téh. Taun méméhna, jumlah siswa anyarna aya 55 urang. Drs. Agus Setiana, M.Si., Kepala SMA Pasundan 7 Kota Bandung, miharep dina taun ieu, target siswa anyarna bisa kahontal.
Salian ti siswa anyar nu régular, SMA Pasundan 7 Kota Bandung gé ayeuna baris narima siswa yatim teu mampu. Nepi ka kamari (5 Juli 2016) kacatet geus aya lima urang siswa yatimna téh. Biayana geratis. Targét taun ayeuna jumlah siswa yatimna 20 peresén tina jumlah siswa régular.
Drs. Agus Setiana, M.Si., ngadadarkeun rencana SMA Pasundan 7 Kota Bandung kahareupna, di antarana, rék nyieun asrama, nu diwangun di sakola. Mitembeyanna mah asrama keur budak yatim. Minimal bisa ngawadahan 20 urang. Laju rék nyieun program boarding school atawa sakola berbasis pasantrén. Kagiatan isuk-isuk nepi ka soré mah kagiatan diajar biasa, soréna nepi ka peuting kagitanana condong kana kagiatan kaagamaan.
“Nu janten margalantaran SMA Pasundan 7 Kota Bandung nampi siswa yatim téh, kagagas basa ningal panti asuhan anak yatim nu dibiayaan tina dagang seblak, asramana gé ngontrak. Ti dinya Bapa sareng réngréngan ti SMA Pasundan 7 Kota Bandung kahudang sangkan ngajait budak yatim nu teu mampu sangkan sakola di SMA Pasundan 7 Kota Bandung. Pihak sakola gé umajak ka singsaha waé nu mampu baris jadi orang tua asuhna ” saur Pa Agus.
SMA Pasundan 7 Kota Bandung dideudeul ku guru bersertifikasi (90%), tenaga administrasi nu pangalaman, rohang diajar nu representatif, pusat sumber belajar, perpustakaan berbasis IT, laboratorium jeung salian ti éta. Lamun nilik kana kampusna mah, perenahna aya di puser kota, paliliwatan angkot ti mana mendi. [MS]***
