H. Agus Komar, Kepala SMPN 39 Kota Bandung (poto dokumentasi SMPN 39 Kota Bandung)
majalahsora.com – Sobat Sora, geus ilahar lamun dina ahir taun ajaran sok aya samen. Komo bari jeung aya panggung tur direuah-reuah ku rupa-rupa acara hiburan. Tapi dina taun 2017 ayeuna mah teu kabéh SMP nu pernahna di Kota Bandung ngayakeun acara kasabit, alatan kauger ku aturan nu lumaku.
Saperti nu kaalaman ku siswa kelas IX SMPN 39 Kota Bandung. Acara pelepasanana basajan pisan, taya acara hiburan komo nepi ka masang panggung sagala. Lumangsung poé Rebo, ping 24 Méi 2017, acarana ukur upacara adat nu dijajap ku anggota ekskul wajib ieu sakola, bari dipirig ku nayaga ieu sakola. Papanganténan nu dijajapna téh, murid awéwé jeung lalaki nu hasil meunang peunteun UAS pang badagna, laju simbolis masrahkeun ijazah.
“Alhamdulillah, acara pelepasan di SMPN 39 Kota Bandung lumangsung lancar. Taun ayeuna mah, acarana benten pisan sareng taun-taun kapengker. Teu aya panggug, teu aya hiburan. Hawatos ari ningal kituna mah, ngarumas. Da aturanana, sakola teu kénging mungut waragad kanggo ngayakeun kagiatan pelepasan siswa kelas IX. Saleresna mah 80 persen siswa kelas IX nu baris lulus taun ayeuna téh, meredih sangkan aya acara pelepasanana kawas taun-taun kapengker. Orang tua murid gé seueur nu ngadeudeul pikeun laksanana kagiatan pelepasan nu ilahar diayakeun di SMPN 39. Sanajan acara pelepasanana sederhana, kagiatanana lumangsung hikmad. Diluuhan ku bapa ibu guru sareng padamel tata usaha,” saur Pa Hidayat, Wakasék Kesiswaan SMPN 39 Kota Bandung.
Jumlah murid kelas IX nu rék lulusna aya 314 urang. Masih dina runtuyan kagaiatan kasabit téh sakalian méré pangajén ka murid nu hasil diistrénan ku Pa Ridwan Kamil pikeun jadi Pramuka Garuda, engkéna baris ngawakilan Indonésia dina Jambore Pramuka tingkat Asean.
“Bapa ngawakilan Pa H. Agus Komar Kepala SMPN 39, nu kaleresan nuju aya pamengan, miharep lulusan ti SMPN 39 Kota Bandung janten siswa-siswi nu sholeh sholéhah, laju kahontal sagala nu dicita-citakeunana, lajeng lebet ka SMA sareng SMK nu dipikahoyong ku aranjeunna. Pengumuman hasil ujian nasionalna baris diumumkeun dinten Juma’ah ping 2 Juni 2017,” saur Pa H. Hidayat nandeskeun deui. [MS]***
