Ahmad Hadadi Kepala Dinas Pendidikan Jawa Barat
majalahsora.com, Garut – Bada Idul Fitri 1438 H, ampir unggal instansi nu aya di lelewek Indonésia sok ngayakeun kagiatan halal bihalal, kaasup di lingkungan Dinas Pendidikan Jawa Barat. Saperti nu lumangsung di SMKN 1 Garut, poé Rebo 19 Juli 2017.
Kagiatanana pikeun meungkeut tali silaturahmi tur koordinasi antara Dinas Pendidikan Propinsi Jawa Barat, nu dipingpin ku Ahmad Hadadi jeung Kepala Sekolah SMA/SMK/SLB negri swasta nu aya dina papayung BP3 Wilayah V, VI, jeung VII.
“Ieu téh dina raraga mageuhan tali silaturahmi, kordinasi sareng ngawangun kebersamaan antara Dinas Pendidikan Propinsi Jawa Barat sareng Kepala Sekolah SMA/SMK/SLB negri swasta nu aya di BP3 Wilayah V, VI sareng VII. Ngahaja dihijikeun supados langkung efisien. Salian ti éta sakantenan masihan arahan ka para Kepala Sekolah, ngeunaan ngokolakeun sakola, ogé pikeun ngaréalisasikeun komitmen pamaréntah sangkan barudak nu lulus SMP di Jabar téh ngalajengkeun sakola ka tingkat nu langkung luhur,” cék Hadadi.
Acarana diluuhan ku Deddy Mizwar, Wagub Jabar, Helmi Budiman, Wabup Garut, Firman Adam, Sekdisdik Jabar, Karyono, Kabid Pendidik, Tenaga Kependidikan dan Bina Pendidikan Anak Usia Dini, Non Formal dan Informal dan Pendidikan Dasar, Dodin R Nuryadin, Kabid SMK Disdik Jabar, Kepala BP3 Wilayah V, VI, VII, Ketua MKKS SMA/SMK sa-wilayah V, VI, VII, para Kepala Sekolah SMA/SMK negri sawasta nu aya di éta wilayah, jrrd.
Patalina reujeung kagiatan PPDB taun 2017-2018 kamari, umumna mah bajalan lancar, sanajan aya baé masalah nu disanghareupan mah. Saperti nu kaalaman di Cirebon nu asup ka BP3 Wilayah V, alatan aya sababaraha masarakat nu demo nepi ka anarkis, ku sabab anakna teu katarima di sakola nu dipikahayangna.
Basa Deddy Mizwar ngadadarkeun biantara dina acara halal bihalal kasabit, anjeunna muji kana sistem PPDB taun 2017 ayeuna, sanajan masih aya kakuranganana. “Ayeuna mah mangsa mayunan PPDB téh Kepala Sekolahna langkung reugreug, teu kawas taun-taun kaliwat. Alatan tos aya sistem nu didamel ku Disdik Jabar. Sangkan langkung saé, tangtu baris diropéa,” cék Deddy Mizar téh.
Patalaina jeung kajadian di Cirebon, Hj. Dewi salaku Kepala BP3 Wilayah V, nu ngawengku Kab. Cirebon, Kota Cirebon, Kab, Kuningan, Kab. Indramayu jeung Kab. Majalengka, nétélakeun “Kajantenan nu lumangsung di Cirebon, alhamdulillah tos réngsé tur dipasrahkeun ka pihak nu berwajib. Sim kuring salaku Kepala BP3 Wilayah V, dina mangsa PPDB taun 2017-2018, sareng Kepala Sekolah tur panitia PPDB, tos luyu ngalaksanakeun aturan Pergub nu lumaku, janten henteu kitu baé nangtoskeun katampi henteuna siswa nu lebet SMA sareng SMK negri téh, koordinasi ongkoh sareng Kepala Disdik Jabar, intina mah nu protés téh nu maksakeun. Janten sacara umum mah PPDB di BP3 Wilayah V téh, lancar,” pokna.
Dina PPDB taun ajaran 2017-2018 ayeuna gé, Pamaréntah Jabar nu dipingpin ku Ahmad Heryawan, nyieun kawijakan nu mihak ka SMA/SMK swasta. Ku sabab ayeuna mah SMA/SMK negri téh kuotana diwatesan. Jadi teu sangeunahna nampa siswa kitu baé. Ku kituna pihak swasta jadi kakocoran siswa nu teu katarima di sakola negri.
“ayeuna mah SMA negri dipasihan kuota maksimal nampi 36 siswa/kelas, maksimal 12 rombel (rombongan belajar). Pami SMK negri kuotana 36 siswa/kelas maksimal 24 rombel,” cék Hadadi deui.
Sora gé harita hasil ngawawancara Kepala SMK YPC, salah sahiji sakola swasta nu aya di Kab. Tasikmalaya, nya éta Drs. Ujang Sanusi. Cék anjeunna dina taun ayeuna sakola swasta nu aya di Kab. Tasikmalaya umumna jumlah siswa anyarna leuwih loba ti batan taun kamari. Kacatet di SMK YPC geus nampa 410 siswa.
Ku acara silaturahmi tur hala bihalal kasabit, Hadadi miharep para Kepala Sekolah nu aya dina papayung Dinas Pendidikan Jabar téh, kudu leuwih déwasa, mangsa aya masalah nu disanghareupan téh kudu bisa muepeuskeunana tur dibérésan di satuan pendidikanana, alatan geus dibéré wewenang ku Disdik Jabar. [MS]***
