Dr. Ir. Ahmad Hadadi, M.Si., Kepala DInas Pendidikan Prop. Jabar
majalahsora.com, Kota Bandung – Lajuning laku tina Keputusan Présidén nomer 87 taun 2017, Poé Rebo 20 Séptembér 2017, Dr. Ir., Ahmad Hadadi, M.Si., salaku Kepala Dinas Pendidikan Propinsi Jawa Barat, ngaresmikeun kagiatan pendidikan karakter di Kota Bandung, tempatna di SMAN 14 Kota Bandung, nu dipupuhuan ku Dra. Tatti Rustati, M.M.
Drs. Dede Amar, M.M.Pd., Kepala BP-3 Wilayah 4 Disdik Prop. Jabar (sapari bulao), Imam, Ketua Komite Sekolah SMAN 14 (batik bulao) & Ahmad Hadadi Kepala Disdik Prop. Jabar
Kaluarna éta keprés téh, boga tujuan nu luhung nya éta keur ngawujudna bangsa nu berbudaya, ngaliwatan ajén inajén religi, jujur, toléran, disiplin, bekerja keras, kreatif, mandiri, demokratis, rasa ingin tahu, semangat kebangsaan, cinta tanah air, menghargai préstasi, komunikatif, cinta damai, gemar membaca, peduli lingkungan, peduli sosial sarta bertanggung jawab.
Kadisdik basa ngadadrkeun amanatna
Acarana diluuhan ku Drs. Dédé Amar, M.M.Pd., Kepala BP-3 Wilayah IV, Kepala SMA nu aya di Kota Bandung, perwakilan guru ti SMA nu aya di Kota Bandung, Ketua Komite Sekolah, siswa SMAN 14 Kota Bandung, jrrd.
Hadadi ngécéskeun yén perluna pendidikan karakter tumerap ka siswa didik nu aya dina papayung Dinas Pendidikan Prop. Jabar téh, alatan loba ajén positipna, komo dina nyanghareupan jaman kiwari. Dihareupeun siswa SMAN 14 Bandung, Kadisdik Prop Jabar ngadadarkeun amanatna, yén pendidikan karakter téh bisa numuwuhkeun ahlaq nu hadé. Contona waé lamun keur di imah, kudu mantuan kolotna, kayaning kukumbah, sasapu, nyeuseuh, hormat tilawat. Kitu ogé di sakola nurut ka guru, sopan, kudu cinta tur ngarawat lingkungan sarta fasilitas sakolana. Mangsa campur gaul jeung papada babaturanana kudu silih ajénan tong pahirihiri. Komo keur nguatan religina, pikeun nu muslim kudu rajin sholat, ngaji, jsté.
Siswa SMAN 14 Bandung
Dina éta acara téh, kabandungan ku Sora, siswa SMAN 14 Kota Bandung nu hadir téh, kalintang sumangetna, ngadangukeun amanat nu ditepikeun ku Kadisdik Jabar. Gaya nepikeunana ngamalir kitu baé, serius tapi santéy matak teu bosen. Hadadi gé méré hadiah ka siswa SMAN 14, alatan bisa ngajawab soal ngeunaan du’a asup toilet.
Para guru nu hadir dina acara kasabit
Cék Hadadi, pendidikan karakter téh engkéna aya instrument penilaianana, ka hareupna siswa téh moal saukur nampa rapot akademik baé, tapi ogé aya rapot pendidikan karakterna. Hal kasabit téh keur dirarancang kénéh sarta nungguan permen anyar ngeunaan pendidikan karakter.
Sakalian Ngaresmikeun Toilét, Rohang UKS anyar SMAN 14 Kota Bandung
Dra. Tatti Rustati, M.M., nyarengan Dr. Ir. Ahmad Hadadi, dina peresmian toilet anyar siswa SMAN 14 Kota Bandung
Sabada ngaresmikeun kagiatan pendidikan karakter di SMAN 14 kota Bandung, Ahmad Hadadi gé laju ngaresmikeun toilet anyar pikeun siswa putra-putri sarta rohang UKS ieu sakola. Jumlahna aya dalapan toilet putra sarta dalapan toilet putri. Di unggal toilet aya tempat ganti pakéan. Masih di gedong kasabit, aya ogé gudang tempat nyimpen peralatan olah raga. Eta wangunan pernahna di gigireun lapang ieu sakola.
Waragad pangwangunanana, bantuan ti orang tua siswa, nu digagas ku Imam, salaku ketua komite sakolana. Imam kungsi dilélér salaku ketua komite teladan sa-Jawa Barat taun 2010. Leuwih ti 80% pangwangunan gedong sakola di SMAN 14 Kota Bandung téh, waragadna ti orang tua siswa. Sanajan aya ogé bantuan ti pamaréntah.
Dra. Tatti Rustati, M.M., salaku Kepala SMAN 14 Kota Bandung, nganuhunkeun pisan kana kasumpingan Kadisdik Prop. Jabar ka sakola nu dipingpingna. Pangpangna sacara langsung ngaresmikeun pendidikan karakter sarta ngaresmikeun wangunan anyar nu aya di SMAN 14 Kota Bandung.
Dina éta kasempetan Hadadi, muji kana peran aktif komite sekolah SMAN 14 Kota Bandung, alatan bisa gawé bareng sacara positif. Pesen anjeunna, sagala pangwangunan nu geus laksana di ieu sakola téh kudu dipiara sacara babarengan.
“Sim kuring muji kana kaayaan SMAN 14 Kota Bandung, nembe tos nguriling ningal wangunan nu aya, relatif beresih, wagunana tohaga. Komo tos hasil janten sakola Adiwiyata Mandiri taun 2016. Mudah-mudahan tiasa ngahontal Sekolah Sehat 2017. Jempol pokona mah,” cék Hadadi téh. [SR]***
