majalahsora – Sobat Sora, tanggal 20 Pébruari nepi ka 21 Pébruari 2017, lumangsung simulasi UNBK SMA sa-Indonésia nu kadua. Patalina jeung éta kagiatan, Majalah Sora ngahaja ngadongdon ka SMAN 4 Kota Bandung (21/2/2017) nu dipupuhuan ku Drs. Dadang Yani, nepangan Pa Agus Ferdiana. S.Pd., Wakasek Kurikulumna.
Kagiatan simulasi UNBK di SMAN 4 Kota Bandung, ngagunakeun 108 unit komputer, cadanganana aya lima unit. Eta komputer téh sumebar diopat rohangan tur maké lima server.
Jumlah siswa nu ngiluanana aya 318 urang, ti jurusan IPA jeung IPS. Eta peserta téh dibagi tilu pluh, pluh kahiji asup pukul 07.30-09.30, pluh kadua asup pukul 10.30-12.30, sarta pluh katilu asup ti pukul 14.00-16.00.
“Alhamdulillah, sacara umum kagiatan simulasi UNBK nu kadua bajalan lancar. Pami dipersentaseukeun mah tos 98 %. Sanaos aya kendala, sapertos dina simulasi dinten kahiji (20/2/2017), nga upload data rada lambat. Salian ti éta dihiji rohangan tokenna teu kaluar waé, kituna téh kira sapuluh menitan. Mun tokenna teu acan ka luar, hartosna siswa nu ngiring UNBK téh moal tiasa ngerjakeun soal. Pami listrik mah teu aya kendala” saur Pa Fredi.
Pa Agus Frediana, S.Pd., Wakasek Kurikulum
Materi pelajaran nu diujikeun dina poé kahiji, nya éta mata pelajaran pilihan. Keur jurusan IPA aya nu ngeusian soal biologi, kimia jeung fisika. Ari keur jurusan IPS mah ngeusian soal ékonomi, geografi jeung sosiologi. Dina poé kadua, ngujikeun pelajaran basa Inggis, nguji listening.
Ibu Riatinda, M.M.Pd., Wakasek Humas SMAN 4 Kota Bandung
“Simulasi UNBK téh ageung pisan mangpaatna kanggo kanggo sim kuring téh, sangkan engké dina ujian nu saenyana lancar. Kamari (20/2/2017) aya masalah sakedik dina masalah sinkronisasi data. Salian ti éta abdi gé tos biasa latihan UNBK ngalangkungan internet,” cék Raka siswa XII IPA I. Eta kamandang Raka téh dihaminan ogé ku Fani, siswa kelas XII-IPA-4, “Alhamdulillah lancar simulasi UNBK-na, sapertos nu disebatkeun ku Raka, aya masalah dina sinkronisasi data, jadi nge-hang jadi lami nga upload datana. Tapi sacara umum mah teu kaganggu teuing. Da waktosna lami dua jam. Pokona mah UNBK téh raos, teu capé ngabuleudan jawaban, sapertos nganggo soal berbasis keretas,” pokna.
Raka & Fani
Mudah-mudahan ku simulasi UNBK nu kadua, siswa SMAN 4 bisa leuwih siap jeung biasa. Di sagigireun éta masalah nu ayeuna kaalaman téh, moal kaalaman deui mangsa UNBK nu saenyana. [MS]***
