H. Aa Sudaya, M.Pd., Kepala SMAN 1 Margahayu Kabupatén Bandung
majalahsora.com – SMAN 1 Margahayu Kabupatén Bandung téh kaasup sakola favorit di Jawa Barat. Salian ti leubeut ku préstasi, ogé boga fasilitas sakola nu kawilang meujeuh. Saban taun loba peningkatanana. Kitu ogé saprak dipingpin ku H. Aa Sudaya, M.Si., nu geus sataun mancén tugas di sakola nu pernahna deukeut Lanud Sulaéman. Ngeunaan préstasina mah éngké urang guar dina warta séjénna.
Patalina jeung kagiatan UNBK taun 2017 ayeuna, nu lumangsung ti ping 10 April nepi ka 13 April, SMAN 1 Margahayu kaasup sakola nu mitembeyan ngalaksanakeunana téh. Taun-taun ka tukang mah ujian nasionalna masih kénéh maké keretas jeung pensil, istilahna mah UNKP.
Nu jadi margalantaran ieu sakola ngalaksankeun UNBK téh, salah sahijina dina raraga ngadeudeul program Jabar Kahiji. Ku kituna ti béh tidu kénéh geus tatahar nyiapkeun sagala halna. Boh pakakasna boh SDM-na.
Sangkan aliran listrikna aman, ti anggangna geus taki-taki nyieun MoU/perjanjian jeung PLN, mangsa pareum listrik atawa aya gangguan, jadi gancang kordinasina. Nya kitu deui jeung PT. Telkom sangkan aman jaringan internetna, jadi henteu lup lep.
Aya 426 siswa SMAN 1 Margahayu nu jadi peserta UNBK taun 2017-na téh. Jolna ti jurusan IPA, IPS jeung Bahasa. Kagiatanana dibagi tilu pluh, unggal pluhna diiluan ku 142 siswa. Rohangan nu dipakéna aya lima, ngawadahan 142 komputer katambah 14 komputer cadangan. Serverna aya genep kaasup jeung cadangan hiji.
Jumlah téknisina aya dua jeung proktor aya limaan. Pengawas silangna ti SMAN 1 Soréang, SMAN 1 Katapang, SMA Angkasa, jeung SMAN 1 Margaasih, jumlahna aya 27 urang.
“Alhamdulillah, pelaksanana UNBK di kawit dinten kahiji dugi ayeuna bajalan lancar teu aya halangan harungan. Kitu ogé siswa SMAN 1 Margahayu 100 persén hadir, teu aya nu absén dugi ka UNBK lekasan. Dinten kahiji ngujikeun basa Indonésia, lajeng dinten kadua matematika, dinten katilu basa Inggris sareng nu terahir pelajaran pilihan jurusan. Nu dipikamelang téh cuaca, palaur hujan ageung dibarung dordar gelap, mung Alhamdulillah lancar teu aya masalah boh jaringan listrikna boh jaringan internetna. Mudah-mudahan hasil UNBK siswa SMAN 1 Margahayu peunteunna langkung saé ti batan ujian nasional taun kamari,” saur H. Aa Sudaya, Kepala SMAN 1 Margahayu nu ngarangkep janten Ketua MKKS SMA sa-Kabupatén Bandung. [MS]***
