Pa Ridwan Kamil Basa muka kagiatan Kemah Bakti Pramuka taun 2016
Gedébagé – Miéling HUT Pramuka nu ka-55 di Kota Bandung lumangsung gebyar, ti tanggal 16-17 Désémber 2016. Tempatna di SOR GBLA (Sarana Olah Raga Gelora Bandung Lautan Api), dibuka poé Jumaah 16 Agustus 2016, ku Bapa Ridwan Kamil, Walikota Bandung ogé salaku Ketua Mabicab Gerakan Pramuka Kota Bandung. Diluuhan ku Bapa Yossi Irianto Sekretaris Daerah Kota Bandung, ogé salaku Ketua Kwarcab Kota Bandung, Pa Elih Sudiapermana, Kepala Dinas Pendidikan Kota Bandung, Kepala Dinas ti dinas lianna, tokoh pramuka camat, lurah, ti kapulisian, Kepala Sekolah SD, SMP, SMA/SMK, jeung réa-réa deui. Pamilonna anggota Pramuka nu jolna ti SD, SMP, SMA/SMK sa-Kota Bandung. Aya ogé anggota Pramuka difabel.
17.000 pamilon kagiatan Kemah Bakti Pramuka di GBLA
Salah sahiji nu ngadeudeul ieu kagiatan nya éta pamilon ti Kecamatan Cicéndo, nu ngirimkeun 475 urang. Saur Pa Fajar Kurniawan, Camat nu ogé janten Ketua Kwaran Kecamatan Cicéndo, Pramuka téh jiwana ngawangun kebersamaan, dina mangsa kiwari mah cocok pisan pikeun meungkeut tali NKRI, mudah-mudahan ku ieu kagiatan mingkin raket deui kebersamaanana téh.
Pa Elih Sudiapermana, Kepala Dinas Pendidikan Kota Bandung & Bu Ulan Sumilan Kepala SDN Buah Batu Selatan
Kagiatanana aya Kemah Bakti Pramuka sarta sababaraha perlombaan, kayaning, semapur, morse, mewarnai, poster, hasta karya, pioneering, sarta fotografi . Pesertana ti tingkat siaga, penggalang, penegak jeung pandiga nu totalna aya 17.000 urang. Jolna ti 30 kwaran (30 kecamatan) nu aya di Kota Bandung.
Pa Fajar Kurniawan, Camat tur Ketua Kwaran Kecamatan Cicendo
“Pramuka Kota Bandung kawentar ku préstasina. Ku kituna ku ayana ieu acara sim kuring miharep Pramuka Kota Bandung kapayunna langkung berpréstasi. Tiasa janten agén perubahan tur jadi lokomotif kahadéan. Ku kagiatan Pramuka mudah-mudahan tiasa nyingkahan kagiatan negatif, kayaning narkoba, pergaulan bebas, miceunan waktu, nu dimimitian ti lingkungan bumi urang,” saur Pa Ridwan Kamil dina biantara upacara pembukaan Kemah Bakti, taun 2016.
Pa Elih Sudiapermana & Pa Enjang Mulyana, Camat tur Ketua Kwaran Kecamatan Batununggal
Dina éta acara gé, Pa Ridwan Kamil masrahkeun sa-unit mobil minibus ka Kwarcab Kota Bandung. Salian ti éta dina taun 2017 baris diwangun Gedong Pramuka, nu boga fasilitas canggih. Tempatna disabudeureun SOR GBLA, lega lahanna kira 2 hektar.
Salian ti hal di luhur dina sela-sela kagiatan upacara pembukaan Kémah Bakti, aya acara pamasrahan piagam ti ORI (Original Record Indonésia), nu dipasrahkeun ka Kang Emil, salaku pemerakarsa rekor, Pa Yossi Irianto salaku kreator rekor ngagorowokkeun kecap “Bandung Juara” bari ngacungkeun jempol ka luhur, nu diiluan ku 17.000 urang di GBLA. Eta penghargaan dipasrahkeun ku Pa Bambang Hartanto, Presiden ORI.
Kang Emil Ketua Mabicab Gerakan Pramuka Kota Bandung
Piagam penghargaan ti ORI gé di pasrahkeun ka Ka Denny Nurdyana, Ketua Pelaksana Kemah Bakti Pramuka, keur kagiatan Kemah Bakti nu diiluan ku 17.000 pamilon. Teu tinggaleun Pa Elih Sudiapermana, salaku Kepala Dinas Pendidikan Kota Bandung tur Pa Enjang Mulyana, Camat Batununggal, Ketua Kwaran Kecamatan Batununggal nampi piagam ti ORI, salaku kreator dina kagiatan Sosialisasi Pemantauan jentik nyamuk terbanyak, nya éta 56.718 ku 10.081 urang kader jumantik pramuka, pelajar jeung masarakat Batununggal. [MS]***
