majalahsora.com – Poé Rebo, ping 24 Méi 2017, Bank Pembangunan Daérah Jawa Barat dan Banten, Tbk (bank bjb) reujeung Pamaréntah Propinsi Jawa Barat, ngayakeun kagiatan syukuran bank bjb nu ka 56 taun, dijejeran Syukur Jabar Untuk Negeri, tempatna di Gedong Sasana Budaya Ganesha (Sabuga), ITB. Lumangsung ti pukul 13.30 nepi ka réngsé. Hal sakabit téh mangrupa runtuyan kagiatan tina acara puncak HUT bank bjb nu ka-56 taun.
Direktur Utama bank bjb, Bapa Ahmad Irfan, nétélakeun dina biantarana, tujuan diayakeunana kagiatan kasabit téh, salah sahiji rasa syukur bank bjb reujeung masarakat Jawa Barat alatan geus kahontalna préstasi sarta kinerja positif bank bjb mangsa nincak umur nu ka-56 taun.
“Hatur nuhun ka sakumna masarakat sareng nasabah, nu tos percanten ka bank bjb, sim kuring miharep bank bjb terus maju janten perbankan nu dipikareueus ku masarakat Jawa Barat hususna tur Indonésia umumna,” saur Pa Irfan.
Pa Irfan gé ngadadarkeun yén bank bjb téh nyepeng pageuh kana komitmenna, istiqomah nyieun rupa-rupa produk sarta méré layanan nu berkualitas katambah dideudeul ku jaringan cabang nu sumebar sarta e-channel bank bjb.
“Di tengah-tengah persaingan perbankan nu mingkin kompetitif, bjb terus ngupayakeun ningkatkeun kualitas produk sareng layananana. Ku kituna jaga bank bjb jadi salah sahiji perbankan pilihan utama pikeun masarakat Indonésia,” cék Pa Irfan Deui.
Pa Ahmad Heryawan, Gubernur Jawa Barat gé, hadir ngaluuhan acara kasabit, disarengan ku garwana nya éta Ibu Netty Prasetiyani Heryawan, Pa Sarwono, Kepala OJK Kantor Regional II Wilayah Jawa Barat, wawakil ti Polda Jabar, wawakil ti Kodam III Siliwangi, direksi, komisaris bank bjb, Ketua KPU Jabar, Kepala Bina Marga Jabar, SKPD Pemda Jabar, jrrd.
Préstasi nu geus kahontal ku bank bjb téh, diaprésiasi pisan ku Pa Ahmad Heryawan, alatan bank bjb kacatet jadi bank pembangunan daérah nomer hiji sa-kuliah Indonésia.
“Pamaréntah Jawa Barat terus ngadorong kamajuan bank bjb sarta kedah mihak ka rahayat. Sabisa-bisa méré kiridit terus kapiara, pangpangna mah masihan injeuman kanggo pangusaha leutik kedah dironjatkeun, sangkan masarakat Jawa Barat leuwih raharja,” saur Pa Ahmad Heryawan téh.
Dina kagiatan kasabit, aya kagiatan sosial nya éta méré santunan ka 1500 budak yatim, méré santunan ka 1000 petugas kaberesihan jalan jeung taman, sarta wakaf 1000 Al Quran keur yayasan jeung majelis ta’lim sa-Bandung Raya. Di sagigireun éta aya acara hiburan ti grup Bimbo sarta Justice Voice. Teu tinggaleun aya tausyiah ti Ustadz Erick Yusuf. [MS]***
