Drs. H. Sugiarto, M.M, Kepala SMAN 5 Kota Bandung
Pa Jajang Priatna, S.Pd, M.M, Waka. Kesiswaan
Pa Dharma Niwana, S.AP, Kepala TU
Sobat Sora, poé Jumaah 10 Juni 2016, Sora nyempetkeun ngalanglang ka wewengkon SMA Negeri 5 Kota Bandung anu perenahna di Jalan Belitung Nomer 8, Kalurahan Merdéka, Kacamatan Sumur Bandung. Saméméhna Sora nepungan heula ka kepala sekolahna, Drs. H. Sugiarto, M.M di rohang damelna. Saur Pa H. Sugiharto satemenna sanlat téh program religi anu dikembangkeun di SMA Negeri 5 Kota Bandung, ngan baé ulah sakadar dijieun kagiatan rutinitas sacara pormalitas wungkul tapi sabisa-bisa sing kapetik siki katut eusina sarta diaplikasikeun kana garapan dina kahirupan sapopoé. Sanlat kasebut tuwuh ti barudak (peserta didik), keur barudak, pakéeun barudak, hususna para peserta didik ieu sakola.
Ditanyakeun ngeunaan materi? Ngawengku kana genep materi anu sifatna métodologi, dialogis jeung prakték aplikatif. Dilaksanakeun opat poé (Jumaah, Saptu, Senén jeung Salasa) gawé bareng jeung UIN Bandung. Opat poé kasabit meunang meureut tina saminggu tumali jeung kariweuh para guru dina pakepuk nyinghareupan taun pelajaran baru, kelulusan jeung kenaikan kelas. Diiluan ku siswa siswi kelas X, 14 guru pangaping kalawan dikokolakeun ku manajemenisasi anu optimal, teu ukur kagiatan ngagarimbung teu puguh, dina harti ulah alakadar ngagugurkeun kawajiban wungkul.
Kagiatanana dimimitian ti pukul 8.00 tepi ka lohor sarta nekenkeun ronjatan karakter kaagamaan. Keur ngabédakeun KBM biasa jeung sanlat, para guru ngabébaskeun pakéan ku cara busana bébas anu nyopan luyu jeung syaréat agama Islam. Nya kitu keur peserta didik non muslim disadiakeun kagiatan kaagamaan apingan guru-guru anu non muslim ogé. Tempat kagiatanana, di sababaraha kelas, aula sakola jeung di masjid sakola.
Harepan Pa H. Sugiarto anu pituin teureuh Kuningan basajan, yén SMA Negeri 5 anu dipupuhuanana ulah pincang sabeulah kasebut sakola pavorit tapi dina widang karakter religiusna minim. Alhasil ulah katémbong moroyoy ti luar tapi sing hadé ogé ti jerona. Tah ku cara ngagederkeun kagiatan sanlat kebek harepan lumarap dina karakter hirup kumbuh sapopoéna boh di lingkungan sakola boh di masarakatna.
Ari (kénca), Razan (kadua ti kénca) bareng jeung babaturanana sumanget ngiluan sanlat di sakola
Geura urang ngobrol jeung peserta sanlat SMA Negeri 5 Kota Bandung, anu kabeneran tepung Sora harita, Razan kelas X-E lulusan SMPN 5 Bandung. Naon waé cenah mangfaat sanlat téh? “Leuwih ningkatkeun ajén ibadah, leuwih ngaoptimalkeun pelajaran agama geusan pibekeleun ayeuna jeung mangsa-mangsa anu bakal datang. Materi-materi anu dipesék jeung dikajina ngawengku SHI (Sumber Hukum Islam), élmu tajwid jeung anu lianna.
“Kagiatan anu teu kinten saéna, tiasa nambih wawasan anu arénggal, nu sateuacanna teu diuninga ku abdi,” cék Razan daria.
Kaduana Ari, kelas X -J lulusan SMPN 5 Bandung. Cék Ari mah resep pisan alatan guru-guruna anu ti UIN energik jeung humoris. Ku kituna, diharepkeun maneuh saban taun dina saban bulan Romadon. Insya Alloh baris diaplikasikeun di luareun sakola.
Sora ogé nepungan séksi acara sanlat, Atollah kelas XI-G lulusan SMPN 2 Bandung, Hanifan Ramadan, kelas XI I IPA lulusan SMPN 7 Bandung salaku ketua pelaksana acara. Réngréngan kapanitiaan jumlahna 40 urang lolobana ti DKM Nurul Khomsah. Cék Atollah, Alhamdulillah kagiatan sanlat lungsur-langsar sok sanajan persiapanana ukur saminggu ka tukang. Pangpangna mah dikuatan ku pangrojong ti Kepala sekolah lantaran kacida alusna geusan ngarobah karakter para peserta didik hususna di lingkungan warga SMA Negeri 5 Bandung. Kagiatan sanlat kasebut nyokot téma “Pemuda Gaul”, Kumaha carana campur gaul para rumaja numutkeun kacamata Islam. Sakumaha diguar di awal kénéh yén matéri anu dikaji dina satlat aya genep rupa; SKI (Sejarah Kebudayaan Islam), Baca-Tulis Alquran, Elmu Hadits, Elmu Fiqih, Aqidah jeung Akhlaq. Kalawan apingan tur atikan ti para pembimbing senior UIN Bandung. Disayagakeun ogé media pangrojongna saperti audio visual. Keur Hanifan, tokoh muda anu jadi inspiratifna nya éta Ustadz Hanan Attaki.
Sora teu poho nepungan sabagéan peserta didik sanlat awéwé, Rania Salsabila, kelas X-F, Khairina Idznihaq, kelas X-F. ieu dua mojang manis anu ngajadikeun tokoh réformis dunia Umar Bin Khothob jeung Ilmuwan Ibnu Shina sabagé tokoh inspiratifna medar kamandangna, cenah kagiatan sanlat di SMA Negeri 5 Bandung kacida hadéna, lantaran difungsikeun keur ngeusian lolongkrang bulan Puasa saenggeus ngalakonan ujian sakola. Cék maranéha satemanna gaul anu kerén téh nyatana maranéhna anu taat dina ngalakonan kawajiban agama tur cerdas ngabédakeun mana anu hadé mana anu goté. Nyakitu cék Anna Aulya Pantja, peserta didik ti Cibiru, kelas XI-IPA G jeung Rahmania Wanda. Z kelas XI-IPA G teureuh Padang.
Atollah & Hanifan
Dina pamungkas obrolan, Sora nepungan Waka. Kesiswaan, Bapa Jajang Priatna, S.Pd, M.M. Saurna kagiatan sanlat téh dina raraga ngeusian bulan suci Romadon anu mangfaatna nya keur para peserta didik ogé keur para guruna. Dilaksanakeun ku 10 warga kelas X wungkul kajaba peserta didik anu non muslim. Guru-guruna disagigireun guru agama SMA Negeri 5 ogé gawé bareng jeung 10 urang para aktivis UIN Bandung. [MS]***
