Bapa Djundjunan, S.Ip., M.Si, Kasie. Kurikulum Disidikbud Kabupatén Bandung
Sobat Sora, poé Senén, 9 Méi 2016 kamari di gedung serba guna SMKN 2 Balééndah, keur diayakeun kagiatan verifikasi dana BOS daérah jeung MoU, pikeun disalurkeun ka SMA/SMK negri swasta di sakuliah Kabupatén Bandung. Sakumaha katerangan ti Kasie. Kurikulum SMA/SMK Disdikbud Kab. Bandung, Bapa Djundjunan, S.Ip., M.Si., “Diancokeun kanggo anggaran taunan, ti kabupaten Rp. 800.000, SMK Rp. 600.000. Anggaran SMA Negri Rp. 200. 000. SMK Negri Rp. 300.000, sedeng swastana Rp. 500.000. Kanggo propinsi diluyukeun sareng kelompok negri-swastana. Dina nyairkeunana kedah memenuhi persayaratan luyu sareng aturan katut ka panduan ti propinsi sakumaha anu parantos disosialisasikeun. Sakola nu tangginas dina nyetorkeun sagala persyaratanana, tangtu sagancangna nampa pencairan. Utamana sakola-sakola swasta, kedah rancinges ulah lénglé diengké-engké. Alatan pencairanana teu langsung ti pusat, tapi ngalangkungan DPPK (Dinas Pendapatan & Pengeluaran Kabupaten) heula, ti DPPK langsung ka Bjb (Bank Jabar Banten). Ti Bjb di transfer ka sakola-sakola. Taun 2016 seméster hiji, direncanakeun sagancangna luyu sareng MoU-na, mudah-mudahan bulan Méi geus teréalisasikeun.”
Drs. Usép Sutarman, M.M.Pd., Kepala SMAN 1 Banjaran Kabupatén Bandung
“Alhamdulillah salami ieu lumangsung kalawan lungsur-langsar. Komo deui saparantos SMA/SMK di Kabupatén Bandung, husus SPP-na tos dibébaskeun. Tinangtos di luar dana insvestasi, perluasan lahan sareng rénovasi wangunan sakola sewang-séwangan anu diayoman ku BP 48. Mudah-mudahan satutas BOSDA (bantuan perasional sekolah daerah) engkéna ngalih ka propinsi, kawijakanana ogé henteu robah,” kitu harepan Pa Djundjunan, S.Ip., M.Si., minangka wakil ti Disdikbud Kab. Bandung.
Pa Tatang Taryana, Kepala SMA Telkom Kabupatén Bandung
Sora nepungan sabagéan kepala sekolah, geusan ngorobét kumaha kamandang aranjeunna kana BOSDA. Naon katerangan anu katangkep ku Sora ti aranjeunna, umumna saragem. Geura urang ngolongan Kepala SMKN 1 Rancaékék. “Alhamdulillah, salami ieu naon rupa bantuan pelayanan ka sakola-sakola, boh sakola negri boh sakola swasta ti kabupatén mangrupa BOS teu kinten saéna,” kitu saur Pa Syamsudin Hermawan, Kepala SMKN 1 Rancaékék.
Pa Syamsudin Hermawan, Kepala SMKN 1 Rancaékék
Nyakitu samangsa menjelang peralihan ka propinsi, tetep teu nguciwakeun. Alatan BOS Kabupatén Bandung kaasup mucekel. Najan kitu para kepala sekolah SMA/SMK di Kabupatén Bandung tetep miharep sangkan aya ronjatan, lantaran pangabutuh sakola ti taun ka taun sok undak. Ku kituna boh pamaréntah pusat, boh pamaréntah propinsi atanapi pamaréntah kabupatén, kudu maneuh merhatikeun kapereluan sakola. Cindekna jumlah nominal bantuan minimal teu robah, syukur-syukur nambahan.
“Alhamdulillah, salami ieu dana Bos, ti Disdiskbud Kabupatén Bandung, karaos ageung mangpaatna. Ngabantos pisan kaperyogian sareng kagiatan di SMA Telkom,” saur Pa Tatang Taryana, Kepala SMA Telkom.
Nalika ngalih ka propinsi, pan teu sadayana SMA/SMK gratis, pangpangna unggal daérah béda-béda, Bandung contona, DSP-na masih sekitar 5 juta tur masih mayar SPP, sedengkeun di kabupatén rata-rata 3 jutaan, SPP-na gratis. Naha perlu aya SPP atawa bayaran dina bentuk séjénna atawa kumaha? Sora ngolongan.
Drs. Usép Sutarman, M.M.Pd., ngawakilan sora para kepala sekolah nerangkeun, ku ayana rarancang pindah ka propinsi, husus keur entragan SMA atawa SMK mémang kurang nyukupan lantaran teu sakabéhna gratis. Ku kituna, ngeunaan kumaha kiat-kiat pihak sakola geusan ngungkulanana gumantung gedé-leutikna bantuan. Alatan éta diperlukeun wujud kerja sama jeung partisipasi ti baragem pihak kaasup para orang tua siswa. [MS]***
